Facebook-ten bas tartqandardyń saıası saýaty tómendeıdi - ǵalymdar

ASTANA. QazAqparat - Bıyl 15 jyldyǵyn atap ótken Facebook adamnyń kúndelikti ómiri men kommýnıkatsııasyn ózgertkeni belgili. Degenmen, bul áleýmettik jeliden bas tartsaq ne bolady? Amerıkalyq ǵalymdar kólemdi zertteý júrgizip, osy suraqtyń jaýabyn izdegen eken.

«2,3 mlrd belsendi paıdalanýshysy bar Facebook álemdegi eń iri áleýmettik jeli. 2,3 mlrd degenimiz - álem halqynyń shamamen úshten birine teń keledi. Ortasha eseppen ár adam Facebook pen oǵan tıesili Instagram men Messenger -de kúnine 50 mınýt ýaqytyn ótkizedi», dep jazady The Guardian basylymy.

Ǵalymdardyń júrgizgen zertteýine qatysqan 1,2 myń adam Facebook akkaýntyn 1 jylǵa óshirý úshin 1-2 myń dollar tólem alýǵa kelisken. Al Stenford pen Nıý-Iork ýnıversıtetiniń ǵalymdary sondaı-aq akkaýnttaryn bir aıǵa óshirýge daıyn 2844 adamdy tapqan.

«Zertteýge qatysqandardyń barlyǵy 18 jastan asqandar. Olar Facebook áleýmettik jelisinde eń kemi on bes mınýt ýaqyt ótkizip júrgen. Zertteý bastalmas buryn qatysýshylar saýalnama toltyryp, saıası kózqarasy, kúndelikti ómiri men óziniń kóńil-kúıi týraly málimetter bergen», dep jazady basylym.

Nátıjesinde belgili bolǵandaı, Facebook-ten bas tartqan adamdardyń saıası saýaty tómendegen. Bul Facebook-tiń kóbine aqparat kózi retinde qoldanylatynyn kórsetse kerek. Sonymen qatar qatysýshylar Facebook joqta aqparat alý úshin gazet betin ashpaǵan.

«Qatysýshylarda kúnine bir saǵat bos ýaqyt paıda boldy. Al Facebook-te belsendi adamdarda bul kórsetkish odan da kóp. Qatysýshylar oflaında otbasymen, dostarymen kóp ýaqyt ótkizgen. Zertteý nátıjelerine sensek, Facebook-ten bas tartý adamnyń kóńil-kúıine jaqsy áser etken. Al zertteý bitken soń qatysýshylar Feısbýkti endi sırek qoldanatyndaryn aıtqan. Degenmen, bir aptadan soń qatysýshylardyń 10%-y áleýmettik jelige kirmese, eki aıdan soń bul kórsetkish 5%-dy quraǵan», dep jazady avtor.