Facebook kompanııasy áleýmettik jelilerdegi aqaýdan 50 mlrd dollar joǵaltty

MENLO-PARK. QazAqparat – Facebook basshysy Mark Tsýkerberg Facebook, Instagram, WhatsApp jáne Messenger jumysyndaǵy aqaýlarǵa qatysty keshirim surady. Buǵan jeli qoldanýshylarynyń reaktsııasy ártúrli boldy. Keıbir adamdar Tsýkerbegtiń keshirimine senbese, ekinshileri ony kelemejdedi. Áleýjeliler aqaýynan lázzat alǵandar da tabyldy, dep habarlaıdy QazAqparat Dailymail-ge silteme jasap.

«Facebook, Instagram, WhatsApp pen Messenger qazirgi kezde qaıta iske qosyldy. Búgingi jaǵdaı boıynsha keshirim suraımyn. Bizdiń serverlerdiń sizder úshin qanshalyqty mańyzdy ekenin túsinemiz», - dedi Tsýkerberg.

Bul tehnıkalyq aqaý saldarynan Tsýkerbergtiń dáýleti 7 mıllıard dollarǵa kemigen.

Kompanııanyń habarlaýynsha, aqaý jańartý saldarynan bolǵan. Qatelikteri bar jańartý negizgi serverlerge jiberilgen. Saldarynan elektrondy ınjenerlik quraldar men aqparat almasatyn servıster zaqymdanyp, tipti esikterdegi elektrondy kulyptar isten shyqqan.

Injenerler serverlerdi qolmen retke keltirý úshin derekterdi saqtaý jáne óńdeý ortalyqtaryna barǵan, alaıda ishine kire almaǵan. Másele ınjenerlerdiń kompanııanyń ınfraqurylymymen júrgizgen alty saǵattyq arpalysynan keıin baryp sheshildi.

Insaıderdiń aqparatyna saı, kompanııanyń kóptegen qyzmetkeri áli de úıden jumys istep otyr. Sol sebepti olardyń ortalyqtarǵa jetýi biraz ýaqyt alǵan.

Osy oraıda Facebook kompanııasynyń aktsııalary bes paıyzǵa tómendedi. Mıllıondaǵan qoldanýshy Reddit pen Twitter-ge kóshti.

Dúısenbi kúni kompanııa derekterdi saqtaý jáne óńdeý ortalyqtary arasyndaǵy jelilik trafıkti úılestiretin negizgi baǵdarlaýyshtar konfıgýratsııasyndaǵy ózgeristiń atalǵan jaǵdaıǵa sebepshi bolǵanyn túsindirdi.

Ortalyqtar arasyndaǵy satyly effekt saldarynan serverler jumysy toqtaǵan.

Aqaý kompanııa serverlerin qolmen retke keltirý arqyly jóndeldi.

Keshe, dúısenbi kúni kompanııa óziniń Twitter akkaýntynda jumystary Facebook kompanııasymen baılanysty álemdegi barlyq adamdar men bıznesten keshirim surady.

Sonymen qatar Facebook kompanııasynyń bas tehnıkalyq dırektory keshirim surady. Kompanııa osy jaǵdaıdan 50 mıllıard dollar joǵaltqan.