Jańbyrshın tasqyn kezinde bılet qymbattatqan tasymaldaýshylar týraly: Olarǵa jalbaqtaıtyn zaman ótti

<p>ASTANA. KAZINFORM &ndash; Májilis depýtaty Edil Jańbyrshın Premer-mınıstr Oljas Bektenovke joldaǵan saýalynda tasqyn kezinde bılet baǵasyn qymbattatqan tasymaldaýshyldyń máselesin maıshammen qaraýdy surady.</p>

«Qazaqta «Jaý jaǵadan alǵanda, bóri etekten tartady» degen sóz bar. Qazir elimizdegi birqatar jolaýshy tasymaldaýshy kompanııalardyń is-áreketi osyny baıqatady.  Óńirlerdiń basym bóligin sý basyp, turǵyndar tilsiz apatpen kúresip, ábigerge túsip jatsa, keıbir áýe jáne temir jol kompanııalary bılet baǵalaryn sharyqtatyp jiberdi. Oılary – osyndaı kúrdeli sátti paıdalanyp, paıda taýyp qalý. Muny «Jyǵylǵan ústine judyryq» demegende, basqasha ne deýge bolady?!» - dedi depýtat.

Edil Jańbyrshın bul málimetterdi baspasózden oqyǵanyn aıta ketti. 

«Baspasóz betterinde jarııalanǵan derekterge qaraǵanda, Atyraýdan Aqtaýǵa ushaqpen jetkisi kelgen jolaýshylar, bir bılet úshin 170 780 teńge tóleýge májbúr boldy. Al Atyraýdan Almatyǵa bılet baǵasy 675 myń teńgege deıin kóterilgen. Almaty, Astana qalalarynan osy óńirlerge qatynaıtyn áýe reısteriniń de baǵasy sharyqtap ketken. Jol qatynasynyń qymbattyǵy jáne áýe, temir jol kólikteriniń azdyǵy, turǵyndardyń sý basqan oblystardan basqa óńirlerge ketýine qıyndyq týǵyzyp otyr. Eldegi kólik salasy tek qaýipsiz jáne sapaly bolyp qoımaı, kópshilikke qoljetimdi bolýy kerek. Osyny kólik kompanııalarynan talap etý qajet, al tyńdamaǵan jaǵdaıda memleket tarapynan qatań shara alynsyn! Olarǵa jalbaqtaıtyn zaman ótti», - dedi ol.

Edil Jańbyrshın tasqyn aımaqtarynda kólik bıletinen basqa zattardyń baǵasy da qubylyp turǵanyn aıtady. 

«Halyq tasqynǵa qarsy judyryqtaı jumylyp jatqanda keıbir alyp-satarlar qara basynyń qamyn kúıitteýde. Quny 50 teńge turatyn qapshyqtyń baǵasyn 200-300 teńgege deıin ósirip, asyra paıda taýyp jatqandar da az emes. Osyndaı kúrdeli kezeńde baǵa turaqtylyǵyn, ásirese, tasqynǵa qarsy qoldanylatyn qural-saımandardyń jáne qurylys materıaldarynyń baǵasyn ustaý - memlekettiń basty mindeti. 

Elimizdegi áýe, temir jol, avtomobıl kólikteri tasymaldaýshylarynyń baǵalaryn turaqty baqylaýǵa alyp, onyń negizsiz kóterilýine jol bermesin. Ásirese, topan sýdan zardap shekken óńirlerdi jalǵaıtyn kólik qatynasyna erekshe nazar aýdarsyn.

Áýe qatynastary tarıfteriniń óspeýin tek 24 sáýirge deıin ustap turmaı, odan keıin de bılet baǵasynyń jyl on eki aı turaqty bolý máselesin qarastyrsyn. 

Sý tasqyny oryn alǵan óńirdegi áleýmettik mańyzy bar azyq-túlik, janar-jaǵarmaı, qural-saıman, qurylys materıaldarynyń jáne taǵy da basqa taýar túrleriniń baǵasyn turaqtandyrýdy qolǵa alsyn jáne ósýine jol bermesin», - dedi depýtat.