Eır-Astana Tel-Avıvtegi qazaqstandyqtardy elge qaıtarýdyń balama joldaryn izdestirip jatyr

<p>Air Astana kompanııasynyń habarlaýynsha osy kezde halyqaralyq áýe kompanııalarynyń kópshiligi qaýipsizdik maqsatynda Tel-Avıvten ushatyn reısterdi toqtatty. Soǵan qaramastan Eır-Astana Tel-Avıvten ketkisi keletin azamattar úshin balama joldardyń barlyǵyn qarastyryp jatyr.</p>

Kompanııanyń habarlaýynsha, ondaı joldar kóp emes. Ushýǵa tyıym salynǵan Tel-Avıv-Almaty baǵytyndaǵy KS650 reısine 138 adam bılet alǵan. Onyń 37-si Qazaqstan azamattary.

Qazaqstannyń 7 azamaty Air Astana kompanııasynyń ınterlaın-seriktesiniń reısine aýystyryldy. Sondaı-aq 19 adam bılet qunynyń tolyǵymen qaıtarylýyn talap etse, 3 jolaýshy áli naqty sheshimge kele almaı otyr.

Áýe kompanııasy sonymen qatar ushýyna tyıym salynǵan Almaty-Tel-Avıv baǵytyndaǵy KS 649 reısiniń jolaýshylarynyń basqa ushaqqa bılet alýyna qolǵabys etip jatyr. Bul rette olarǵa ózderiniń qalaýy boıynsha Túrkııa men Grýzııaǵa ushý usynyldy.

Osylarmen qatar kompanııada el azamattarynyń Qazaqstannyń Izraıldegi elshiligimen WhatsApp chat arqyly habarlasýyna qoldaý kórsetip, aqyl-keńes beretin qyzmetker bekitildi. Sondaı-aq Izraılden ushyp ketýmen baılanysty máseleler boıynsha táýlik boıy jumys isteıtin jedel jeli iske qosyldy.

[phone] (telefon) jáne [phone] (WhatsApp).

Air Astana Izraılden ushyp ketýge nıet bildirgen qazaqstandyqtardyń barlyǵynyń elge oralýyn qamtamasyz etýge kúsh salyp otyr.

«Jolaýshylardy Izraılde júrgen kezde qaýipsizdik talaptaryn saqtap, áýe kompanııasynyń jańalyqtaryna qulaq túrip júrýge shaqyramyz»,-delingen habarlamada.

Osyǵan deıin Air Astana kompanııasynyń Tel-Avıv reısterine bılet satýdy ýaqytsha toqtatqanyn habarladyq.

Sondaı-aq Almatydan Tel-Avıvke ushýǵa tıis bolǵan KS649 reısi toqtatylǵanyn jazdyq.