«Eır Astana» memlekettik aktsııalarynyń paketi ulǵaıtylǵan jaǵdaıda ǵana «Halyqtyq ІRO»-ǵa qatysa alady - Samuryq-Qazyna

ASTANA. 28 qarasha. QazAqparat - «Eır Astana» AQ «Halyqtyq ІRO» baǵdarlamasyna tek memlekettik aktsııalarynyń paketi ulǵaıtylǵan jaǵdaıda ǵana qatysa alady. Bul týraly búgin Astanada ótken baspasóz máslıhatynda «Samuryq-Qazyna» AQ basqarýshy dırektory Nurjan Baıdáýletov aıtty.

Onyń aıtýynsha, qazirgi kezde «Samuryq-Qazyna» UÁQ-nyń basqarýyndaǵy kompanııanyń memlekettik aktsııalarynyń paketi 51 paıyzdy quraıdy. Al qalǵan 49 paıyzy brıtandyq BAE SYSTEMS kompanııasyna tıesili.

«Bizdiń paketimiz bólshektenbeıdi, qolda bar paketimizden ІRO-ǵa eshteńe bólýdi josparlap otyrǵan joqpyz. Degenmen, qandaı da bir jaǵdaılarmen olar kóbeıip jatsa, ondaı múmkindikter qarastyrylady», - dep atap ótti Nurjan Baıdáýletov.

Basqarýshy dırektor kompanııany qurýǵa Qazaqstan Úkimetiniń 8,5 mln. AQSh dollary kóleminde ınvestıtsııa jasaǵanyn, áýe kompanııasy osy ýaqyt ishinde memlekettik bıýdjetke 38,2 mlrd teńgeden artyq (278,07 mln. dollar) salyq pen ózge de mindetti tólemder jasaǵanyn jetkizdi.

«Kompanııa 2006-2012 jyldary Qazaqstan jaǵyna dıvıdend túrinde 7,04 mlrd teńge, al BAE SYSTEMS brıtandyq aktsıonerine 6,57 mlrd. teńge tólegen», - dedi N. Baıdáýletov.