«Eır Astana» kompanııasy «Airbus A320neo» ushaqtaryna basymdyq beredi

ASTANA. QazAqparat - Aldaǵy úsh jylda «Eır Astana» áýe parki jańa ushaqtarmen tolyǵady.  Búgin Úkimette ótken baspasóz máslıhatynda QR Investıtsııalar jáne damý birinshi vıtse-mınıstri Alık Aıdarbaev osylaı málim etti, dep habarlaıdy QazAqparat.

«Eır Astana» áýe kompanııasy qarqyndy damyp keledi. Park 31 ushaqtpen qamtylǵan jáne olardyń ortasha jasy 6-8 jyldy quraıdy. «Eır Astana» áýe tasymaldaýshy kompanııasy 2020 jyldyń sońyna deıin «Airbus A320neo» áýe kóliginiń 10 danasyn alýdy josparlaýda. 2019 jyly eki «Boıng 787» ushaqtary alynady»,-dedi A. Aıdarbaev.

Budan bólek ol jańadan ashylǵan áýe reısterine toqtaldy. 2017 jyly Astanada  9 jańa halyqaralyq áýe baǵdarlary ashyldy.

«2019 jyly Tokıo men Sıngapýrǵa, al 2020 jyly Shanhaı men Nıý-Iorkke áýe baılanysyn ashý josparlanyp otyr»,- dedi Alık Aıdarbaev.

Esterińizge sala keteıik, Ult josparynyń 67-qadamynda «Eır Astana» áýe tasymaldaýshy jáne «QTJ» ulttyq kompanııalaryn iri halyqaralyq operator retinde damytý eskerilgen.