«Eır Astana» áýe kompanııasyna reısin keshiktirgeni úshin aıyppul salyndy
- Kóptiń narazylyǵyn týdyrǵan reıster keshigýiniń artýyna baılanysty 18 shildede komıtet tóraǵasy Talǵat Lastaev «Eır Astana» kompanııasynyń ókilderimen shuǵyl keńes ótkizdi. Kompanııaǵa áýe kemelerin kommertsııalyq josparlaýdaǵy kemshilikter, turaqty reısterdi toqtatýǵa jol berilmeıtindigi, áýe kemelerin almastyrý boıynsha jedel árekettiń joqtyǵy, reısterdiń keshigýi kezinde áýe kompanııasy personalynyń jyldam áreket etpeýi syndy eskertýler aıtyldy. Kezdesý nátıjesinde «Eır Astana» rezervti qamtamasyz etý úshin jeke ushaq bóldi. Ol tek reıs keshigip qalǵan jaǵdaıda ǵana paıdalanylady, - dep habarlady vedomstvodan.
Qazaqstandyq iri áýe kompanııalarynyń aktsıonerine ushaqtardyń kestesin josparlaý boıynsha jumysty jandandyrý usynylady.
Ózara is-qımyldy nyǵaıtý maqsatynda «Qazaqstannyń avıatsııa ákimshiligi» AQ jáne «Eır Astana» áýe kompanııasy qyzmetkerleriniń qatysýymen Almaty jáne Oral qalalarynyń áýejaılarynda kezdesýler ótti.
- Shildeniń 16-syna josparlanǵan Almaty-Male reısiniń uzaq keshigýine baılanysty eki kúnniń ishinde jedel túrde tekserý jumystary júrgizildi. Sonyń qorytyndysy boıynsha bul reıstiń jolaýshylary 15 saǵattan astam ýaqyt ushýdy kútkeni anyqtaldy. Osy reıstiń jolaýshylaryna kútý kezinde «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» Qazaqstan Respýblıkasy Zańynyń 86-baby 1-bóliginde kózdelgen qyzmetter, atap aıtqanda qonaqúılerden bólme berilmegen. Osyǵan baılanysty 21 shildede áýe kompanııasyna qatysty ákimshilik is qozǵalyp, 1 000 AEK mólsherinde aıyppul salyndy», - dep habarlady Azamattyq avıatsııa komıtetinen.