EXPO ortalyǵynda «Jańa jyl Fest» jármeńkesi bastaldy
Jármeńke úsh kún boıy saǵat 12:00-20:00 aralyǵynda Máńgilik El dańǵyly 53/1 mekenjaıynda ótedi.
«Eń aldymen, «Jańa jyl Fest» jármeńkesi – áleýmettik joba, óıtkeni, mıkro, shaǵyn jáne orta bıznes ókilderin, otandyq qolónershilerdi qoldaý maqsatynda ótkizilip jatyr. Oǵan Astanadan bólek, Almaty, Shymkent, Aqmola, Mańǵystaý, Qyzylorda, Óskemen, Qostanaı, Kókshetaýdan 200-ge jýyq kásipker keldi. Osyndaı aýqymdy sharada otandyq óndirýshiler men qolóner sheberlerine basa mán berildi. Bizdiń kompanııa 40-tan astam qolónershige qoldaý kórsetip, tegin oryn berdi», - deıdi «QazExpoCongress» ulttyq kompanııasynyń baspasóz hatshysy Gúljan Sergebaeva.
Jármeńkede otandyq oıynshyqtar, jańajyldyq syılyqtar, áshekeıler, toqyma kıimder, túbit oramaldar, taǵamdar, kıiz buıymdary men at ábzelderi satylyp jatyr. Kelýshiler taýar alyp qana qoımaı, mereke qarsańyndaǵy demalystaryn qyzyqty ótkize alady.
Jármeńke aıasynda ulttyq kompanııa múgedektigi bar balalarǵa, jetim balalarǵa, kópbalaly otbasy balalaryna tegin erteńgilik uıymdastyrady. Onda Aıaz ata, Aqshaqar jáne mýltfılm keıipkerleri bolady.
Oǵan qosa, balalarǵa kıizden merekelik shulyq jasaý, slaım, bilezikter, shyrsha áshekeıleri, ashyqhattar jasaý boıynsha sheberlik saǵattary, sán kórsetilimi, jańajyldyq fotoaımaqtar men tamaqtaný oryndary uıymdastyrylǵan.
Sonymen birge, jastarǵa arnalǵan mádenıet jáne sport festıvali – Qogam Urban Festival ótip jatyr. Ol Hip-Hop, Breaking, Freestyle, skeıtbordıng, fýtbol frıstaıly, parkýr syndy 12 baǵytty qamtıdy.
«Bul – «QazExpoCongress» uıymdastyrǵan ekinshi jármeńke. Buǵan deıin tamyz aıynda mektepke daıyndyq naýqanyn júrgizip, barlyq qajetti buıymdar men mektep formasyn, otandyq óndirýshiler men ata-anany bir alańǵa jınaǵan edik. Búgin de bizdiń otandyq óndirýshiler taýarlaryn jeńildetilgen baǵada usynady. Qazirgi ýaqytta jármeńkeni 8 myńnan astam adam tamashalady», - deıdi Gúljan Sergebaeva.