Evo Morales Bolıvııaǵa qaıtýǵa daıyn ekenin málimdedi

BÝENOS-AIRES. QazAqparat – Bolıvııanyń eks-prezıdenti Evo Morales sársenbi kúni eldegi saıası daǵdarysty beıbit jolmen sheshýge shaqyryp, ol úshin qaıtyp barýǵa daıyn ekenin aıtty, dep habarlaıdy «QazAqparat» HAA TASS-qa silteme jasap.

«Eger meniń qatysýym arqyly ozbyrlyqty toqtatyp, adam ómirin saqtaıtyn beıbit sheshimge (daǵdarysqa) úles qosa alsam, men ony súıikti Bolıvııam úshin jasaımyn», - dep jazdy ol Twitter-degi paraqshasynda.

Ol barlyǵyn «qoǵamdyq qozǵalystar, azamattyq uıymdar men saıası partııalar qatysatyn dıalogqa» shaqyrdy.

Eske sala keteıik, burynǵy prezıdent Morales Bolıvııany tastap, Meksıkadan saıası baspana tapqan bolatyn. Sebebi onyń ómirine qaýip tónip turǵan edi.

Morales jeksenbi kúni prezıdent saılaýynyń daýly nátıjeleri boıynsha birneshe aptaǵa sozylǵan narazylyqtan keıin otstavkaǵa ketken bolatyn. Ol ketýge májbúr bolǵanyn, muny «elde endi qantógis bolmas úshin» erikti túrde jasaǵanyn aıtty. Eldiń qarýly kúshi, oppozıtsııasy men kásipodaqtary onyń otstavkaǵa ketýin surady.

Keıin Bolıvııa oppozıtsııasynyń senatory Janın Anes ózin eldiń ýaqytsha prezıdenti dep jarııalady.

Morales Anestiń ýaqytsha prezıdent bolatyny týraly málimdemesin aıyptap, Twitter-degi resmı paraqshasynda «bul - tarıhtaǵy eń aram jáne abyroısyz tóńkeris» dep jazǵan bolatyn.