EUÝ Jýrnalıstıka fakýlteti amerıkalyq professormen beınekonferentsııa ótkizdi
Genrı Djenkıns – Ońtústik Kalıfornııa ýnıversıtetiniń kommýnıkatsııa jáne jýrnalıstıka boıynsha Annenberg mektebiniń Provost professory. «Tsıfrlyq dáýir: transmedıalyq tehnologııalardy qoldaný erekshelikteri» atty konferentsııa ZOOM platformasynda uıymdastyrylǵan.
Ýnıversıtettiń Oqý isi jónindegi prorektory Erkin Ońǵarbaev amerıkalyq professorǵa alǵys aıtyp, qurylǵanyna 25 jyl tolǵan ýnıversıtet úshin halyqaralyq kollaboratsııa árdaıym strategııalyq baǵyt bolyp qalatynyn jetkizdi. Sonymen birge, eki ýnıversıtet arasyndaǵy ǵylymı baılanystardy damytýǵa, birikken ǵylymı jobalar ázirleýge shaqyrdy.
«Álemdik QS reıtınginde 120-orynda turǵan Ońtústik Kalıfornııa ýnıversıteti – kommýnıkatsııa men medıa zertteýler boıynsha Amerıkanyń úzdik ýnıversıteti. Osy ýnıversıtettiń Annenberg mektebi – búkil álem tanıtyn ǵylymı ortalyq. Al tsıfrlyq tehnologııalar ár adamnyń, qoǵam men memleketterdiń ómirin ózgertti, ǵalamdyq kommýnıkatsııa ekonomıkalyq ıntegratsııany kúsheıtti. Meniń «Aqparatty jetkizýdiń medıaaralyq strategııalary» avtorlyq kýrsyma qyzyǵýshylyq óte joǵary, bıyl bul kýrsqa 25 magıstrant jazyldy. Bul aqparat dáýirinde transmedıalyq tehnologııalarǵa suranystyń óskenin kórsetedi», - dedi konferentsııany uıymdastyrýshy, EUÝ professory Ulbosyn Esenbekova.
Konferentsııada magıstranttar Genrı Djenkınstiń ǵylymı zertteý baǵyttarymen, amerıkalyq medıaındýstrııadaǵy konvergentsııa men transmedıalyq storıtellıngtiń damý tendentsııalarymen tanysty.
«Meniń zertteý tobymda USC-diń 15 magıstranty jumys isteıdi. Olar birlesip, transmedıa mádenıetiniń saıası áserin zertteıdi. Bizdiń jobalar AQSh-taǵy belsendi jastar týraly, mıgratsııa, adam quqyǵy, ekologııalyq máseleler taqyryptaryn qamtydy (...) Búgingi konferentsııaǵa shaqyrǵandaryńyz úshin alǵys aıtamyn. Men eki el arasynda ǵylymı baılanys ornatý múmkindigin óte jaqsy baǵalaımyn, Qazaqstan ǵalymdarymen kezdesip, tanysqym keledi. Atlantada tún ortasy bolsa da, sizdermen sóılesý múmkindigi qatty unady», - dedi professor G. Djenkıns.
Sonymen birge, konferentsııaǵa EUÝ Jýrnalıstıka jáne saıasattaný fakýltetiniń dekany Qaırat Saq, Teleradıo jáne qoǵammen baılanys kafedrasynyń meńgerýshisi Serikzat Dúısenǵazy jáne Nazarbaev ýnıversıtetiniń, TMD elderiniń ýnıversıtetteriniń ókilderi qatysty.