Eýroparlament Eýrokomıssııanyń jańa quramyn bekitti

<p>ASTANA. KAZINFORM &mdash; Búgin Strasbýrg qalasynda ótken Eýroparlamenttiń kóshpeli otyrysy barysynda onyń prezıdenti Ýrsýla fon der Lıaıenniń ekinshi mandaty kezindegi Eýropalyq komıssııanyń jańa quramy bekitildi, dep habarlaıdy Kazinform agenttiginiń menshikti tilshisi.</p>

Quramdy 370 adam qoldap, 282 adam qarsy daýys bergen, 36 depýtat qalys qaldy.

Daýys berý aldynda Ý.Lıaıen óz komandasy men baǵdarlamasyn tanystyrdy. 

«Biz jumysty dereý bastaýǵa daıynbyz», — dedi ol ózi basqaratyn komıssııa árqashan bostandyq, egemendik, qaýipsizdik pen órkendeý úshin kúreske adal bolatynyn atap ótip.

Ý.Lıaıen Eýropalyq komıssııanyń birinshi bastamasy AQSh pen Qytaıdan Eýropanyń ınnovatsııalardaǵy alshaqtyǵyn azaıtýǵa, qaýipsizdik pen táýelsizdikti arttyrýǵa jáne dekarbonızatsııany qamtamasyz etýge arnalǵan «Básekege qabilettilik kompasy» bolatynyn jarııalady.

Eýropalyq «jasyl mámile» týraly aıta otyryp, ol: «Biz onyń maqsattaryna jetý úshin baǵytty ustaýymyz kerek jáne solaı bolady» dedi. Ol jasyl ónerkásiptik kelisimdi engizýge, eýropalyq avtomobıl ónerkásibiniń bolashaǵy týraly strategııalyq dıalogty bastaýǵa, básekege qabiletti aınalmaly ekonomıka men Eýropalyq jınaq jáne ınvestıtsııa odaǵynyń qurý jolyndaǵy jumysty jalǵastyrý mindetin ózine aldy.

Álemde bolyp jatqan qaqtyǵystar týraly aıta kele, Ý.Lıaıen «Eýropa osy salalardyń barlyǵynda belsendirek ról atqarýy kerek» dep, bul «burynǵydan da qajet» ekenin atap ótti.

Bizdiń qaýipsizdigimizdi nyǵaıtý sheshýshi mánge ıe dedi ol Eýropany qorǵanysqa kóbirek aqsha bólýge shaqyryp.

«Eýropanyń qaýipsizdigi árqashan osy Komıssııanyń basymdyǵy bolady», — dep qosty ol.

Ý.Lıaıen jáne onyń jańa komandasymen talqylaýdan keıin Eýroparlament músheleri Komıssarlar alqasyn saılady. 

Komıssarlar alqasy óz mindetterine bıylǵy jyldyń 1 jeltoqsanynan bastap kirisedi dep kútilip otyr. Eýroparlament músheleri aldaǵy bes jylda Eýrokomıssııa mindettemeleriniń oryndalýyn baqylaıdy.

Eske salsaq, buǵan deıin Germanııada tutynýshylardyń senim ındeksi jumys oryndarynyń qysqarý qaýpine baılanysty tómendegeni habarlandy.