Eýroparlament depýtaty: Joldaýdaǵy basty másele - halyqtyń ál-aýqatyn arttyrý

BRıÝSSELЬ. QazAqparat - Eýropa parlamentiniń (EP) depýtaty, Ortalyq Azııa elderimen yntymaqtastyq jónindegi EP delegatsııasynyń basshysy Iveta Grıgýle-Peters QR Prezıdentiniń «Qazaqstandyqtardyń ál-aýqatynyń ósýi: tabys pen turmys sapasyn attyrý» atty Joldaýyna qatysty pikirin bildirdi, dep habarlaıdy «QazAqparat» HAA-nyń menshikti tilshisi.

«Men Nursultan Nazarbaevtyń Qazaqstan halqyna arnaǵan Joldaýymen tanystym. Eýropada biz únemi adam bárinen artyq, adamdarǵa ınvetıtsııa salý qajet, sonda ǵana Eýropa odaǵyndaǵy memleketterdiń damýyn kútýge bolady degendi aıtamyz. Prezıdent N.Nazarbaev memleketti damytýdyń mańyzdy baǵyttaryn naqty kórsete otyryp, basty nazar halyqtyń ál-aýqatyn arttyrýǵa baǵyttalýy tıistigin, óıtpegen jaǵdaıda azamattar sapaly medıtsınalyq kómekke, bilimge qol jetkize almaıtynyn, óz otbasyn asyraı almaıtynyn atap kórsetti», - deıdi I. Grıgýle-Peters.

Onyń aıtýynsha, árbir qazaqstandyq kózdelgen reformalardyń mánin túsinýi qajet.

«Jumys isteý, ınnovatsııalyq joldardy izdeý, shaǵyn jáne orta bıznesti damytý qajet, qoǵam ortaq maqsat tóńiregine birigýi tıis», - dedi ol.

Latvııalyq Eýroparlament depýtaty Joldaýdaǵy tapsyrmalardy oryndaýǵa, ásirese ınvestıtsııalar tartý máselesinde qatań baqylaý júrgiziletinine úmit artatynyn jetkizdi.  Pikirinshe, sheteldik ınvestorlarǵa jete kóńil bólmeýshilik jaǵdaılary kezdesedi.

«Prezıdent sybaılas jemqorlyqqa qarsy kúres máselesin de qozǵady. Sybaılas jemqorlyq - ózekti problema. Memlekettik apparatty qysqartýdyń mańyzy zor. Ol (memlekettik apparat) úlken bolsa, reformalardy tejeıdi», - deıdi I. Grıgýle-Peters.

Saıasatker Qazaqstannyń ǵylym-bilim jáne densaýlyq salalaryna quıatyn qarjy kólemin arttyrý josparyn quptady.

«Latvııada da osyndaı másele bar. Medbıkelerdiń, oqytýshylardyń, áleýmettik jumysshylardyń jalaqysy az. Qazaqstan ekonomıkasynyń ósýi áleýmettik shyǵyndar kólemin ulǵaıtýǵa múmkindik beredi», - dedi spıker.

I. Grıgýle-Peters sot júıesi men quqyq qorǵaý organdaryn reformalaýǵa da tilektestik bildirdi. Bul rette ol Qazaqstan tarapyna Alaıaqtyqpen kúres jónindegi eýropalyq bıýronyń tájirıbesin úırenýdi usyndy.

«Latvııada da, basqa elderde de polıtsııada jáne sot júıesinde reformalar júrgizilgen. Qazir jaǵdaı jaqsara bastady. 5-7 jyl buryn ǵana jolda ereje buzǵandar sol jerde-aq polıtsııamen «kelisip kete» alar edi. Qazir bári de ózgergen», - dedi ol.