Eýropanyń birneshe elinde qýańshylyqtan qaýiptiń «qyzyl» deńgeıi jarııalandy
Bıylǵy shilde sońǵy 60 jylda jaýyn-shashyn eń az túsken aı boldy. Júzden astam kommýna aýyzsýmen tapshylyq kórip otyr, egin qýrap ketý aldynda.
«Qazirgi jaǵdaıdy qalypty dep esh aıtýǵa bolmaıdy. Qazirgideı qurǵaqshylyq buryn-sońdy bolǵan emes. Jáne jaǵymsyz jańalyq – munyń toqtaıtynyna esh negiz joq bolyp tur», - dedi Frantsııa ekologııa mınıstri Krıstof Beshý.
Frantsııanyń barlyq departamentteri qurǵashylyqqa baılanysty erekshe baqylaýǵa alyndy. Olardyń altysynda qaýiptiń eń joǵary deńgeıi engizildi. Bul deńgeı sýdy paıdalanýda úlken shekteýlerdi qarastyrady.
Italııanyń 16 qalasynda, sonyń ishinde Rım, Mılan, Florentsııa men Genýıada qaýiptiliktiń eń joǵary «qyzyl» deńgeıi jarııalandy. Munda40 gradýstan joǵary temperatýra saqtalyp otyr. Sınoptıkter demalys kúnderi túnde aýa baǵamy 30 gradýsty kórsetetinin boljaýda.
Nıderland úkimeti sýdy únemdeýge, ıaǵnı vannany azyraq qabyldaýǵa, kólikterdi jýmaýǵa, gúlzarlardy sýarmaýǵa shaqyrdy. Birneshe kún buryn koroldikte qajet bolǵan jaǵdaıda sýdyń berilýin rettep otyratyn krızıske qarsy top qurylǵan bolatyn. Eldegi kóptegen ózenniń tartylyp qalǵany sonshalyq, nasostar isten shyqqan. Dýnaı sekildi iri ózenderdiń deńgeıi de tómendep barady. Bolgarııanyń, Rýmynııa men Serbııanyń shekaralary túıisetin jerde ózenniń tartylýynan aralshyqtar paıda boldy. Shilde aıynyń sońynda Dýnaıdyń birneshe ýchaskesinde keme júrisi toqtatyldy.
Eske salaıyq, Eýropada aptap ystyqtan orman órti órship otyrǵanyn jazǵan bolatynbyz.