Eýropanyń azamattyq avıatsııa salasy daǵdarysqa ushyrap jatyr
Búginde Eýropa áýejaılary ushý kvotalaryn engizgen. Sondaı-aq, avıakompanııalar kestelerdi qysqartyp, reısterdi toqtatyp, bılet qunyn qymbattatqan. Bul – kompanııalardyń paıda tabý úshin emes, kerisinshe bıletterdi az satý úmitimen jasap jatqan qadamy.
Eýropada bolyp jatqan daǵdarystyń sebebi – demalys maýsymynda ushaq bıletterine degen suranystyń shamadan tys artýy. Tıisinshe kóp kólemdegi týrısterge qyzmet kórsetý úshin jumys kúshi jetispeı jatyr.
Buǵan deıin bolǵan karantındik shekteýler kezinde avıakompanııalar kóptegen qyzmetkerlerin jumystan qysqartqan. Eńbekkerlerdiń endi bir bóligi indet juqtyryp, em alyp jatyr. Sondaı-aq, jalaqyny kóterýdi talap etip, jumysqa shyqpaı otyrǵan kompanııa personaldary da az emes. Mundaı daǵdarys tek avıakompanııalarda ǵana emes, sonymen qatar áýejaı jáne temirjol salasynda da oryn aldy.
Sondyqtan, qazir qyzmetkerler barynsha keńeıtilgen kestede jumys istep jatyr. Degenmen, kez kelgen kishigirim keleńsizdik mol shyǵynǵa alyp kelýi múmkin. Atap aıtqanda, kompıýterlik júıedegi qandaı da bir aqaý – Eýropa áýejaılarynyń jumysyn qurdymǵa ketiredi. Jumys kúshiniń jetispeýshiligin sheshý úshin keıbir elderdiń bıligi ımmıgratsııalyq erejelerdi jeńildetýge kiristi. Al, Irlandııa eger Dýblın áýejaıynda kadr jetispese, ásker tartýǵa ýáde berdi.
Áýejaılar shekteý kvotalaryn engizdi
Eýropada áýereısteriniń keshigýi men toqtatylýy kóbeıgen. Máselen, Official Aviation Guide deregi boıynsha, Londondaǵy Hıtroý áýejaıynda keshiktirilgen reıster sany 2019 jylmen salystyrǵanda 78 paıyzǵa ósken.
Avıakompanııalar reısterdi aldyn ala toqtatyp jatyr
Avıakompanııalar jaz maýsymyna arnalǵan reıs kestelerin qysqartyp tastap otyr. Endi alynyp tastalǵan reısterdiń jolaýshylary demalystaryn úıde ótkizedi. Olar qonaq úı, jalǵa alǵan kólik jáne balalar lagerlerine jumsalǵan aqshalaryn óndirip ala almaıdy.
Másele budan da shıelenise túsýi múmkin
Jaz mezgiliniń basynan Ispanııa, Italııa, Frantsııa, Belgııa jáne Portýgalııadaǵy «Ryanair» kompanııasynyń bortserikteri, «Brussels Airlines» avıakompanııasynyń ushqyshtary jáne frantsııalyq Sharl-de-Goll jerden baqylaý qyzmetteriniń jumysskerleri ereýilge shyqty. Olar jalaqyny kóterip, eńbek jaǵdaıyn jaqsartýdy talap etip otyr. Degenmen, atalǵan kompanııalar budan shyǵynǵa bata qoıǵan joq. Máselen, ereýilder nátıjesinde «Ryanair» shamamen 2 paıyz, «Air France» 10 paıyzǵa jetpeıtin reısterin joǵaltqan.
Biraq, skandınavııalyq «SAS» áýe kompanııasy 10 kúnge jalǵasqan qyzmetkerler ereýilinen keıin reısterdiń jartysynan kóbin alyp tastady. Kompanııa naryqta qalý úshin shyǵyndaryn qysqartyp jatyr. Degenmen, basshylyq qabyldaǵan mundaı sheshimge kásipodaq músheleri narazy.
Desek te, sońǵy kezderi ereýilderdiń birshama bóligi turaqtalǵan. Dálirek aıtqanda, «Norwegian Air» ushqyshtardyń, «British Airways» tirkeý bóliminiń qyzmetkerlerin jáne Sharl-de-Golldaǵy órt sóndirý jáne jerdegi baqylaý qyzmeti jumyskerleriniń sany qysqartylmaıtyn boldy. Atalǵan kompanııa basshylyqtary óz eńbekkerlerin ustap qalý úshin olardyń talaptaryn oryndaý sheshimin qabyldapty.
Bul daǵdarysqa qatysty Halyqaralyq áýe transporty qaýymdastyǵynyń (IATA) basshysy Ýıllı Ýolsh pikir bildirdi. Onyń aıtýynsha, bul – alǵashqy daǵdarys emes. Sondaı-aq, Ýıllı Ýolsh aldaǵy ýaqytta osy jaǵdaılardan sabaq alyp, qorytyndy shyǵaratynyn jetkizdi.
Foto: reuters.com