Eýropalyqtardyń 80%-y shyǵynyn aıtarlyqtaı qysqartýǵa májbúr

BRıÝSSELЬ. QazAqparat - Frantsııadaǵy Secours Populaire kedeıshilikke qarsy úkimettik emes uıymy júrgizgen zertteý kórsetkendeı, eýropalyqtardyń jartysynan kóbi qarjylyq táýekeldi sezinedi, al 80 paıyzy shyǵyndaryn aıtarlyqtaı qysqartýǵa májbúr, dep habarlaıdy QazAqparat tilshisi Guardian basylymyna silteme jasap.

Saýalnamaǵa sáıkes, árbir tórtinshi eýropalyq azamat energııanyń qymbattaýy men ınflıatsııaǵa baılanysty ómir súrý qunynyń ósýine baılanysty qıyn qarjylyq jaǵdaıǵa tap boldy.

Frantsııa, Germanııa, Grekııa, Italııa, Polsha jáne Ulybrıtanııa turǵyndary arasynda júrgizilgen saýalnama osy elder azamattarynyń jartysynan kóbi (54%) sońǵy úsh jylda satyp alý qabiletin joǵaltqanyn kórsetti. Buǵan negizinen azyq-túlik, otyn, jylý jáne jalǵa alý baǵasynyń qymbattaýy sebep bolǵan.

Respondentterdiń 62%-ǵa jýyǵy jol shyǵynyn qysqartqanyn, 47%-y jylýdy únemdeı bastaǵanyn, 40%-y ekinshi jumys tapqanyn, 29%-y – keıbir tamaqtan bas tartqanyn aıtty. Respondentterdiń 64%-y basqa neni únemdeý kerektigin keıde sheshe almaıtynyn moıyndady, óıtkeni olar bárin azaıtyp qoıǵan, al 27%-y úıinen aıyrylyp qalýdan qorqady.

Saýalnama kórsetkendeı, alty eldegi respondentterdiń 48%-y balalaryn jaqsy tamaqtandyrý úshin ózderi jeıtin keı azyqtan bas tartqanyn aıtty.