Eýropalyq odaq Ortalyq Azııanyń senimdi seriktesi bolýdy jalǵastyrady - Valdıs Dombrovskıs

BІShKEK. QazAqparat – Jańaratyn energııa kózderine kóshýge ekpin qoıý kerek. Bul týraly Bishkekte «Eýropalyq Odaq – Ortalyq Azııa» ekonomıkalyq forýmynda Eýropalyq komıssııanyń vıtse-prezıdenti Valdıs Dombrovskıs aıtty, dep habarlaıdy QazAqparat tilshisi.

«Ortalyq Azııa men Eýropalyq odaq arasynda seriktestikti nyǵaıtýǵa múddelimiz. Osy oraıda kásiporyndardyń turaqtylyǵyn kóterý úshin bıznesti qoldaýǵa ekpin qoıý mańyzdy. Ortalyq Azııa memleketteri pandemııadan keıin ekonomıka salalaryn qalpyna keltirý ustanymdaryn ilgeriletýde joǵary áleýetke ıe. Bul turǵyda Eýropalyq odaq álemde Ortalyq Azııanyń senimdi seriktesi bolýdy jalǵastyra beredi. Biz sizderdiń KVI saldarymen kúreste kúsh-jigerlerińizdi qoldaımyz», - dedi V. Dombrovskıs.

Bul baǵytta ol EO qarjylaı qoldaý jasaýǵa ázir ekenin jetkizdi.

«Tıimdilikti artyrý úshin densaýlyq saqtaý júıesin tsıfrlandyrýǵa erekshe mán berilgen jón. Kovıd indeti máselesimen qatar, biz (Ortalyq Azııa óńiriniń) Aýǵanstandaǵy ahýalǵa baılanysty sizderdiń alańdatyp otyrǵan máselelerdi jaqsy túsinemiz. Osy oraıda atalǵan kúrdeli jaǵdaıdy retteýde Ortalyq Azııa elderimen birlese jumys isteýge nıettimiz. Sonymen qatar, aýǵan halqyn qoldaýǵa daıynbyz», - dedi Eýropalyq komıssııanyń vıtse-prezıdenti.

Budan bólek ol kómirtek ónimdi modelden bas tartý kerek ekenin jáne jańaratyn energııa kózderine kóshýge ekpin qoıýdyń mańyzdylyǵyn atady. Zııandy lastaǵash zattardy qysqartý úshin EO kómirtek úlesi azdaý ónimderdi ımporttaıdy.

Budan buryn habarlanǵandaı, búgin Bishkekte Premer-Mınıstrler deńgeıinde «Eýropalyq Odaq – Ortalyq Azııa» ekonomıkalyq forýmy bastaldy.

Búgin Bishkekte QR Úkimet basshysy Asqar Mamın Eýropalyq komıssııanyń vıtse-prezıdenti Valdıs Dombrovskıspen kezdesti.