«Eýropalyq Odaq – Ortalyq Azııa» forýmy 2023 jyly Qazaqstanda ótýi múmkin

BІShKEK. QazAqparat – Ortalyq Azııaǵa eýropalyq ınvestıtsııalardy tartý jáne qurylymdaý úshin «Astana» halyqaralyq qarjy ortalyǵynyń alańy mańyzdy ról atqara alady. Bul týraly Bishkekte «Eýropalyq Odaq – Ortalyq Azııa» ekonomıkalyq forýmynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Búgingi forýmdaǵy múmkindikti paıdalana otyryp, «Eýropalyq Odaq – Ortalyq Azııa» ekonomıkalyq forýmynyń 2023 jyly Qazaqstandy qabyldaýshy tarap retinde usynbaqpyn», - dedi Asqar Mamın.

Úkimet basshysy Ortalyq Azııaǵa eýropalyq ınvestıtsııalardy tartý jáne qurylymdaý úshin qazirgi ýaqytta EO-dan 70-ke jýyq kompanııa qolaıly salyqtyq, vızalyq jáne eńbek rejıminde jumys isteıtin «Astana» halyqaralyq qarjy ortalyǵynyń alańyn usyndy.

Premer-Mınıstr «Ortalyq Azııa – EO» iskerlik keńesin qurý bastamasyn kóterdi. Oǵan eki óńirdiń ekonomıkalyq bloktarynyń mınıstrleri, bıznes basshylary, sondaı-aq qarjy ınstıtýttarynyń, saýda jáne ónerkásip palatalarynyń ókilderi qatysady.

Budan buryn habarlanǵandaı, búgin Bishkekte Premer-Mınıstrler deńgeıinde «Eýropalyq Odaq – Ortalyq Azııa» ekonomıkalyq forýmy bastaldy .

Asqar Mamın sońǵy 10 jylda Eýropalyq odaqqa múshe elder óńirge 110 mlrd eýrodan astam ınvestıtsııa salǵanyn jetkizdi.

Úkimet basshysy Ortalyq Azııa men Eýroodaq elderin ekonomıkany damytý isin kúsheıtýge shaqyrdy.

Búgin Bishkekte QR Úkimet basshysy Asqar Mamın Eýropalyq komıssııanyń vıtse-prezıdenti Valdıs Dombrovskıspen kezdesti.