Eýropalyq ınstıtýt Qazaqstan men AQSh prezıdentteriniń kezdesýine pikir bildirdi

BRıÝSSELЬ. QazAqparat - Azııalyq zertteýlerdiń eýropalyq ınstıtýtynyń sarapshysy Alberto Tıýrkstra Elbasy Nursultan Nazarbaev pen AQSh Prezıdenti Donald Tramptyń kezdesýi qorytyndysyna pikir bildirdi, dep habarlaıdy «QazAqparat» HAA menshikti tilshisi.

«Qazaqstan Táýelsizdik alǵan kezeńnen bastap AQSh-tyń mańyzdy strategııalyq seriktesi boldy. Shyn máninde, KSRO ydyraǵannan keıin Qazaqstan Respýblıkasynyń Táýelsizdigin alǵashqy bolyp moıyndaǵan elderdiń biri AQSh ekeni belgili», - dep toqtaldy A. Tıýrkstra.

Sarapshynyń paıymynsha, kóptegen perspektıvaly jobalarǵa baılanysty turaqty Ortalyq Azııa Vashıngton úshin mańyzdy. Atap aıtqanda, óńir búginde strategııalyq jaǵdaıǵa ıe, sebebi Qytaıdyń, Ońtústik Azııa men Taıaý Shyǵystyń qarqyndy damyp kele jatqan naryqtary arasynda turǵan Ortalyq Azııanyń tartymdylyǵy arta tústi.

Sonymen qatar Alberto Tıýrkstra Qazaqstan ekonomıkasyna ınvestıtsııa salýda AQSh-tyń aldyńǵy qatarly rólin aıta kele, jańǵyrtý baǵdarlamalaryn júzege asyrǵannan keıin bul baǵyttaǵy baılanystar arta túsetindigin sóz etti.

«Qazaqstan uzaq merzimdi perspektıva turǵysynda turaqty ekonomıkalyq sektorlarǵa betburys jasap otyr. Osy oraıda ekonomıkanyń básekege qabilettigi men ónimdiligin arttyrý baǵytynda tıisti qadamdar iske asyrylýda», - dep atap ótti ol.

Onyń aıtýynsha, Qazaqstannyń jańǵyrtý men ártaraptandyrý josparlary amerıkalyq ınvestorlar úshin tartymdy bolýy múmkin.

«Bul rette aýyl sharýashylyǵy, aqparattyq tehnologııalar jáne ózge de basymdyqty salalar boıynsha ózara is-qımyldar  artady degen oıdamyn», - dep túıdi Alberto Tıýrkstra.