Eýropalyq Odaq ekologııalyq qylmys úshin jazany kúsheıtti

<p>ASTANA. KAZINFORM - Eýropalyq Parlament ekologııalyq qylmystar tizimin keńeıtip, olardyń jazasyn kúsheıtetin jańa EO dırektıvasyn qabyldady. Adam ólimine ákeletin ekologııalyq qylmys jasaǵandarǵa 10 jylǵa deıin bas bostandyǵynan aıyrý jazasy qarastyrylǵan, dep jazady <a href="https://www.dw.com/ru/evrosouz-uzestocil-nakazania-za-ekologiceskie-prestuplenia/a-68388313" target="_blank" rel="noopener">DW</a>.</p>

Eýroparlament (EP) 27 aqpan kúni ekologııalyq qylmyspen kúresý jónindegi jańartylǵan EO dırektıvasyn maquldady. EP saıtynda habarlanǵandaı, Eýroparlamenttiń 499 depýtaty qujatty qoldap, 100-i qarsy daýys berip, taǵy 23-i qalys qaldy.

Qujatta qorshaǵan ortaǵa qarsy qylmystardyń tizbesin keńeıtý jáne olarǵa jazany kúsheıtý kózdelgen. Kúrdeli ekologııalyq buzýshylyqtarǵa, zańsyz kesilgen aǵash saýdasy, qorshaǵan ortaǵa zııan keltiretin mashına bólshekterin zańsyz kádege jaratý, ekologııalyq zııandy hımııalyq zattardy paıdalaný jáne kádege jaratý erejelerin buzý jatady.

Jańa dırektıva EO-nyń resmı jýrnalynda jarııalanǵannan keıin kúshine enedi. Múshe memleketterge ony ulttyq zańnamada bekitýge eki jyl ýaqyt beriledi.

«Jańa ekologııalyq qylmystardyń aldyn alý úshin úılesimdi jáne tosqaýyldyq sanktsııalardy qoldana otyryp, EO deńgeıinde transshekaralyq qylmystarmen kúresýdiń ýaqyty keldi», - dedi Gollandııalyq Eýroparlament depýtaty Antonıýs Manders.

Ol jańa zańnamaǵa sáıkes, qorshaǵan ortanyń lastanýyna jaýapty kásiporynda basshylyq qyzmet atqaratyn tulǵalar kásiporynnyń ózimen teń jaýapkershilikke tartylýy múmkin ekenin atap ótti.

Jeke adamdar men kompanııalarǵa  ekologııalyq qylmys jasaǵany úshin segiz jylǵa deıin bas bostandyǵynan aıyrý jazasy qarastyrylǵan. Ólimmen aıaqtalatyn qasaqana ekologııalyq qylmystar úshin EO-nyń barlyq elderinde qylmysker 10 jylǵa deıin bas bostandyǵynan aıyrylady.

Kompanııalardyń qorshaǵan ortaǵa qarsy aýyr qylmysy úshin jyldyq aınalymynyń 5%-na deıin aıyppul nemese 40 mln eýroǵa deıin tólem qarastyrylǵan.