Eýropalyq kompanııalardyń artýy ınvestıtsııalyq tartymdylyǵymyzdyń jaqsarǵanyn bildiredi - Premer

<p>Astanada QR Premer-Mınıstri Álıhan Smaıylovtyń tóraǵalyǵymen &laquo;Qazaqstan-Eýroodaq&raquo; dıalog platformasynyń 13-shi otyrysy ótti. Іs-shara ortalyq memlekettik organdardyń birinshi basshylarynyń, dıplomatııalyq korpýs pen bıznes ókilderiniń qatysýymen ótti, dep habarlaıdy <a href="https://www.inform.kz/" target="_blank" rel="noopener">Kazinform</a>.</p>

Otyrysta respýblıkanyń salyq jáne keden júıelerin jetildirý, farmatsevtıka ónerkásibin, geologııalyq barlaý men agrarlyq ındýstrııany damytý, bızneske lıtsenzııa, nesıe berý jáne qoldaý kórsetý, eksporttyq-ımporttyq operatsııalardy júrgizý kezinde júktemeni azaıtý, sondaı-aq basqa da birqatar másele egjeı-tegjeıli talqylandy.

Premer-Mınıstr óz sózinde búgingi tańda Eýropalyq odaq Qazaqstannyń eń iri saýda jáne ınvestıtsııalyq seriktesi ekenin atap ótti. Eýropalyq ınvestıtsııalardyń jalpy kólemi $175 mlrd-tan asty. Atap aıtqanda, 6 aıda EO elderi QR ekonomıkasyna $5,2 mlrd ınvestıtsııa saldy.

«Qazaqstannyń syrtqy saýdasynda EO úlesi shamamen 30%-dy quraıdy. 10 aıda taýar aınalymy $34 mlrd-tan asty. Bul kórsetkishter saýda-ekonomıkalyq yntymaqtastyqty arttyrýǵa negizdelgen júıeli baǵytymyzdy aıqyndaı túsedi», — dedi Álıhan Smaıylov.

Úkimet basshysynyń aıtýynsha, búginde QR ekonomıkasynyń túrli salalarynda 3 myńnan astam eýropalyq kompanııa tabysty jumys isteıdi, olardyń ishinde Shell, Eni, Air Liquide, Alstom jáne Claas sııaqty iri transulttyq korporatsııalar bar.

«Aǵymdaǵy jyl ınvestıtsııalyq ózara is-qımyldy damytýda óte jemisti boldy. Ortaq pýl jańa iri jobalarmen tolyǵa túsýde. Buǵan Svevind kompanııasynyń jasyl sýtegi jobasyn iske asyrýy, Total kompanııasymen qýaty 1 GVt bolatyn jel parkin salý týraly kelisim, Knauf kompanııasynyń 4-shi gıpsokarton zaýytyn ashý jospary, sondaı-aq Scania kompanııasynyń kólik quraldarynyń iri quramdas bólshekterin qurastyrý jumystaryn iske qosýy jarqyn mysal bola alady», — dedi Úkimet basshysy.

Onyń aıtýynsha, Qazaqstanda eýropalyq kompanııalar qatarynyń arta túsýi respýblıkanyń ınvestıtsııalyq tartymdylyǵynyń jaqsarǵanyn bildiredi.

Bıznes úshin qolaıly jaǵdaılar jasaý jáne ınvestıtsııalyq ahýaldy jaqsartý Úkimettiń basym mindetteriniń biri ekeni atap ótildi.

«Biz sapaly jáne uzaq merzimdi ınvestıtsııalardy tartý úshin barynsha qolaıly jaǵdaılar jasaýǵa umtylamyz. Ol úshin eń úzdik álemdik standarttarǵa sáıkes ınvestıtsııalardy qoldaýdyń normatıvtik-quqyqtyq bazasy men quraldary turaqty negizde jetildirilip otyrady», — dedi Álıhan Smaıylov.

Premer-Mınıstr Qazaqstanda ESG standarttaryn eskere otyryp, Investıtsııalyq saıasattyń 2026 jylǵa deıingi tujyrymdamasy qabyldanǵanyn eske saldy. Jobalardy sapaly ınfraqurylymmen qamtamasyz etý úshin Ulttyq ınfraqurylymnyń 2029 jylǵa deıingi jospary ázirlenýde. Jańa Salyq kodeksi aıasynda ákimshilendirýdiń servıstik modeli engiziletin bolady.

«Investorlarǵa memlekettik qyzmetterdi alý jáne jobalardy sapaly júrgizý yńǵaıly bolýy úshin Ulttyq tsıfrlyq ınvestıtsııalyq platforma ázirlenýde», — dedi Álıhan Smaıylov.

Jalpy, Premer-Mınıstrdiń aıtýynsha, QR Úkimeti qolaıly ınvestıtsııalyq ahýal jasaýǵa baǵyttalǵan memlekettik saıasatty kezeń-kezeńmen jalǵastyrady.