Eýropalyq keńes «DAISh» pen «Ál-Kaıdaǵa» qarsy sanktsııalar merzimin uzartty

<p>ASTANA. KAZINFORM - Búgin Eýropalyq keńes &laquo;DAISh&raquo; pen &laquo;Ál-Kaıdaǵa&raquo; (Qazaqstanda tyıym salynǵan uıymdar - red.), sondaı-aq osy uıymdarmen baılanysy bar toptarǵa, jeke tulǵalarǵa, kásiporyndar men uıymdarǵa qarsy shekteý sharalarynyń merzimin uzartty.&nbsp;</p>

EO sanktsııalary bir jylǵa – 2025 jyldyń 31 qazanyna deıin uzartyldy.

Qazirgi tizim 15 adamǵa jáne 6 topqa qatysty. Onda atalǵandardyń aktıvteri toqtatylady, al jeke tulǵalarǵa EO-ǵa kirýge tyıym salynady.

Sonymen qatar, EO-nyń jeke jáne zańdy tulǵalaryna sanktsııalar tizimine engizilgen tulǵalarǵa qarajat, qarjylyq aktıvter nemese ekonomıkalyq resýrstar berýge tyıym salynady.

Brıýsselde Eýroodaq lańkestik shabýyldardy josparlaý, qarjylandyrý jáne júzege asyrý, sondaı-aq búkil álem boıynsha lańkestik nasıhatty taratý arqyly halyqaralyq beıbitshilik pen qaýipsizdikke qater tóndiretindermen kúresýge daıyn ekeni basa aıtyldy.

2016 jyldyń qyrkúıeginen bastap Eýroodaq «DAISh» pen «Ál-Kaıdaǵa», sondaı-aq olarmen baılanysty adamdarǵa, toptarǵa, kásiporyndar men uıymdarǵa qarsy óz betinshe sanktsııalar engizdi.

Buǵan deıin «Úlken jetilikke» múshe memleketter Taıaý Shyǵystaǵy aýqymdy aımaqtyq soǵysty qalaı toqtatý kerektigi týraly kelisimge kele almady. EO-nyń Saýd Arabııasyndaǵy burynǵy elshisi Lýıdjı Narboneniń aıtýynsha, shıelenisti jeńildetý jónindegi dıplomatııalyq qarym-qatynas naqty nátıjelerge ákelgen joq.

Eýropalyq Odaq elderiniń kópshiligi óz azamattaryn Lıvan aýmaǵynan ketýge shaqyrdy.