Eýropada halyq sany azaıyp keledi

NUR-SULTAN. QazAqparat –Eýropalyq Odaq halqynyń sany azaıyp keledi. Eýrostatıstıka málimetinshe, 2021 jylǵy 1 qańtardaǵy jaǵdaı boıynsha Eýroodaqtyń 27 elinde turatyn adam sany 12 aıda 278 myń adamǵa azaıyp, 447,2 mıllıon adamǵa jetkeni aıtylady, dep habarlaıdy QazAqparat Euronews-ke silteme jasap.

2001 jyly Odaqta 429 mıllıon adam ómir súrgen. Halyqtyń tabıǵı ósimi, ıaǵnı týý men ólim arasyndaǵy aıyrmashylyq 2020 jyly -2,5-ke deıin tómendedi. Bul COVID-19-ǵa baılanysty bolýy múmkin. Óıtkeni pandemııa resmı málimetterge sáıkes EO boıynsha shamamen 1,09 mıllıon adamnyń ómirin qıdy. 65 jastan asqan adamdar qazir Eýropalyq Odaq turǵyndarynyń besten birin quraıdy, al 80 jastaǵy jáne odan da qart adamdardyń sany sońǵy 20 jylda 2001 jylǵy 3%-dan 6%-ǵa deıin eki ese ósti.

Sonymen qatar, 20 jasqa deıingi adamdardyń sany 2001 jylǵy 23%-dan 2021 jyly 20%-ǵa deıin azaıdy. Eýrostat derekteri sondaı-aq áıelderdiń erlerge qaraǵanda shamamen 5% kóp ekenin jáne bul araqatynas ásirese Baltyq elderinde birkelki emes ekenin kórsetedi. Latvııa, Lıtva jáne Estonııadaǵy áıelderdiń sany erkekterge qaraǵanda sáıkesinshe 16%, 13% jáne 10% kóp. Alaıda, odaqqa múshe memleketter ishinde kerisinshe áıelderge qaraǵanda er adamdar kóp elder de bar. Olar Malta, Lıýksembýrg, Shvetsııa jáne Slovenııa.