Eýropa Odaǵy kıberqorǵanys júıesin kúsheıtpekshi
Jańartylǵan qorǵanys júıesi jalpyeýropalyq kıberqorǵanys arqyly álemdik jeliden keletin shabýyldardyń aldyn alýǵa jáne anyqtaýǵa negizdelgen, dep habarlaıdy QazAqparat Euronews-ke silteme jasap.
Eýrokomıssııanyń atqarýshy vıtse-tóraǵasy Margrete Vestager sársenbi kúni bul másele boıynsha EO-ǵa múshe kóptegen memleketter yntymaqtasa áreket etetinin aıtty.
«Bul máseleni eshkim óz betinshe sheshe almaıdy. Óıtkeni eshkimde onymen kúresýge qajetti jetkilikti resýrs joq jáne keń aýqymdy kıbershabýyldyń qaı ýaqytt bolatynyn eshkim dóp basyp aıta almaıdy. Biz osyǵan deıin joıqyn shabýyldardyń kýási bolǵanbyz. Solardyń biri Irlandııanyń densaýlyq saqtaý júıesine jasalǵan shabýyl. Bul shabýyldardyń bolyp jatqany birneshe aı boıy belgisiz bolyp keldi»,-dedi Margarete Vestager.
Eýropa Odaǵy hakerlik shabýyldar nemese memlekettik saıttardy buzý anyqtalǵan boıda dereý jaýap berýge qabiletti tótenshe jaǵdaı mehanızmin jasamaqshy. Bul qaýipterdi beıtaraptandyrýmen aınalysatyn sarapshylardyń jáne sertıfıkattalǵan kompanııalar rezerviniń bolýyn bildiredi.
Eýropanyń Digital Europe tsıfrlyq kompanııalar uıymynyń basshysy Sesılııa Bonefeld Daldiń pikirinshe, kıbershabýyldarǵa tótep berýdiń kepili memleket pen jeke sektordyń seriktestigi bolmaq.
Eýroodaqtyń kıberqorǵanys júıesiniń qurylysyna 1,1 mıllıard eýro bólý usynylyp otyr, onyń úshten ekisi Eýroodaqtyń jalpy bıýdjetinen túsedi.