Eýropa Odaǵy qazaq tilinde «Eýropa áleminde» atty ertegi kitabyn jaryqqa shyǵardy

NUR-SULTAN. QazAqparat - Qazaqstandaǵy Eýropalyq Odaq ókildigi tuńǵysh ret «Eýropa áleminde» atty ertegiler jınaǵyn qazaq tilinde jaryqqa shyǵardy, dep habarlaıdy QazAqparat.

Kitapta Eýropanyń mádenı murasynyń biryńǵaı toptamasy retinde Eýropalyq Odaq elderiniń ańyzdary men basqa da dástúrli ertegileri jınaqtalǵan. Kitaptyń maqsaty – Eýropa halyqtarynyń tańǵajaıyp halyq dástúrleriniń ortaq negizin tabý, sonymen birge Eski qurlyqtyń qundylyqtarynyń birligin kórsetý.

Kitapta Eýropalyq Odaqqa múshe 27 eldiń árqaısysynyń halyq ertegileri, ańyzdary, ári naqyl sózderi keltirilgen, sol arqyly olar ortaq ejelden kele jatqan mádenı sabaqtastyǵyn kórsetedi. Jınaqtaǵy keıbir asa sırek kezdesetin ertegiler qazaq tilinde tuńǵysh ret jarııalanyp otyr. Atalmysh kitapta batyrlar, aıdaharlar, periler týraly ne halyq ázil –syqaǵyna toly túrli hıkaıalardy kezdestirýge bolady.

«Qazaqstandyq oqyrmannyń basym kópshiligi osy ertegilermen tanys ekenine senimdimin. Mádenıet shekara talǵamaıdy, qurlyqtarǵa, keıde odan da tys aımaqtarǵa óris jaıady. Sol sebepti bizdiń uqsastyǵymyz biz oılaǵannan da kóbirek. Bul kitaptyń maqsaty - osy baılanysty kórsetý», - deıdi Eýropalyq Odaq Elshisi Sven-Olov Karlsson.

Kitap boıynsha jumys jarty jyl júrgizildi. Barlyq ıllıýstratsııany Qazaqstan Sýretshiler Odaǵynyń músheleri, daryndy apaly-cińili Ǵalııa jáne Balqııa Qusaıynovalar saldy.

«Eýropa álemin beıneleıtin sýretter arqyly oqyrmandar ertegi keıipkerlerimen júzdesip, col zamannyń sıqyr men qııal álemine jol ashady dep úmittenemiz», - dep atap ótti Ǵalııa jáne Balqııa Qusaıynovalar.

Kitaptyń tusaýkeserine arnaıy Qazaqstandaǵy Eýropalyq Odaq Ókildigi onlaın naýqanyn jarııalady. Kúndelikti Ókildiktiń áleýmettik jeli paraqshalarynda EO-ǵa múshe memleketterdiń Elshileri beınerolık formatynda ertegilerdi oqyp, Eýropanyń ǵajaıyp ertegiler álemine oqyrmandardy saıahattaýǵa shaqyrady.

«Eýropa áleminde» ertegiler kitabynyń elektrondy nusqasyn myna siltemege kirip, oqı alasyz.