Eýropa men Azııanyń birqatar elinde koronavırýs taǵy órship ketti - Alekseı Tsoı

NUR-SULTAN. QazAqparat – Densaýlyq saqtaý mınıstri Alekseı Tsoı Eýropa men Azııanyń birqatar elinde koronavırýstyń taǵy órship ketkenin málim etti, dep habarlaıdy QazAqparat tilshisi.

«Qazaqstanda engizilgen qatań sharalardyń arqasynda 5 shildeden beri aýrýhanalarda tósek oryndardyń júktemesi 6 ese, jansaqtaý bólimindegi tósek oryndardyń júktemesi 6,6 ese azaısa, koronavırýs ınfektsııasy boıynsha jedel járdem shaqyrý jaǵdaıy 5,5 ese tómendedi. Emhanalar úıinde qyzmet kórsetý tártibine kóship ketti. Mobıldi brıgadalardyń sany 6,7 ese kóbeıip, qazirgi tańda olardyń eldegi sany 3 640-qa jetti», - dedi Alekseı Tsoı Úkimet otyrysynda.

Mınıstr Qazaqstanda epıdemıologııalyq aýhal turaqtalǵanymen Eýropa men Azııanyń birqatar memleketinde tamyz aıynan bastap koronavırýs ınfektsııasynyń órshýi baıqalǵanyn jetkizdi.

«Máselen aýrý Italııa, Avstrııa, Ispanııa, Germanııa, Ońtústik Koreıa, Túrkııa elderinde órshýde», - dedi ol.