Eýropa qurǵaqshylyqqa baılanysty sýdy únemdeýge kóshti

NUR-SULTAN. QazAqparat – Frantsııada aptap ystyq pen týrıstik maýsymnyń qyzǵan shaǵynda sýdy paıdalanýǵa shekteýler engizildi. Elde qurǵaqshylyq qaýpi jarııalandy, biraq jaǵdaı ár aımaqta ártúrli jáne soǵan qaraı qabyldanyp jatqan sharalar da bir-birinen ózgeshe, dep habarlaıdy QazAqparat euronews-ke silteme jasap.

Máselen, Lıonda ázirge kógaldy sýarýǵa nemese mashına jýýǵa bolmaıdy. Tyıymdy buzǵanǵa aıyppul salynýy múmkin. Ońtústiktegi Lazýrnyı jaǵalaýynda júzge jýyq kommýna sý tapshylyǵyna ushyrady. Jergilikti jaǵajaılardaǵy dýsh baǵanalarynda sý toqtatyldy.

Qurǵaqshylyq kórsetkishteriniń biri – sý qoımalarynyń tartylýy. Savoıdaǵy Ansı kólinde jaz bastalǵaly beri sý deńgeıi 33 sm-ge tómendedi. Ázirge bul jaǵdaı flora men faýnaǵa áser etpegen. Biraq, adamdar qazirdiń ózinde, atap aıtqanda sý kóligine baılanysty biraz qıyndyqqa tap bolyp jatyr.

Sý tapshylyǵy Eýropanyń kóptegen aımaqtary úshin kúrdeli máselege aınalyp otyr. Majarstanda meteorologtar 1901 jyldan beri, ıaǵnı bir ǵasyrdan astam ýaqytta bolmaǵan eń qurǵaq jeti aıdy tirkedi. Sý resýrstary bas basqarmasynyń málim etýinshe, bıyl jaýyn-shashynnyń ortasha mólsheriniń jartysy ǵana jaýǵan.

Ulybrıtanııada aptap ystyq aýyl sharýashylyǵyna qıyndyq týǵyzdy. Fermerler malǵa kók shóptiń qalmaǵanyn jáne egindi sýarý úshin sý jetkiliksizdigin aıtady.

Bılik sý tutynýdy shektep jatsa, ekologtar batpaqtardy qalpyna keltirýdi usynyp otyr. Mamandardyń aıtýynsha, bul shara qurǵaqshylyqpen uzaq merzimdi kúresý úshin jetkilikti ylǵal jınaýǵa múmkindik beredi.

Foto:euronews.com