Eýropa halqynyń 50% astamy koronavırýstyń «omıkron» shtamyn juqtyrýy múmkin

NUR-SULTAN. QazAqparat – Aldaǵy 1 – 1,5 aıda Eýropa halqynyń 50% astamy koronavırýstyń «omıkron» shtamyn juqtyrýy múmkin. AQSh-ta koronavırýs juqtyrýdyń antırekordy tirkeldi. QazAqparat álemdegi ahýal týraly Qazaqstanda KVI-diń taralýyna jol bermeý jónindegi vedomstvoaralyq komıssııanyń Telegram-kanalyna silteme jasap habarlaıdy.

Aldaǵy 6-8 aptada Eýropa halqynyń 50% astamy koronavırýstyń «omıkron» shtamyn juqtyrýy múmkin. Bul týraly Dúnıejúzilik densaýlyq saqtaý uıymy Eýropalyq bóliminiń basshysy Hans Klýge Vashıngton Ýnıversıteti densaýlyq kórsetkishteri men baǵalaý ınstıtýtynyń boljamyna silteme jasap habarlady. Ol qazir Eýropa men Ortalyq Azııanyń 50 elinde «omıkron» ınfektsııasy anyqtalǵany týraly málim etti.

Avstrııa Kantsleri aqpan aıynda koronavırýsqa qarsy mindetti vaktsınatsııany engizý josparyn rastady. Karl Nehammerdiń aıtýynsha, tıisti zań jobasynyń parlamenttik saraptamasy aıaqtaldy. Usynystardy eskere otyryp, qujatty «qabyldaý» qaldy. «Meniń oıymsha, mindetti vaktsınatsııa qajettiligi kúmán týdyrmaıdy», — dedi Nehammer.

Ótken táýlikte álemde koronavırýs juqtyrýdyń anyqtalǵan jańa jaǵdaılarynyń sany 3,28 mıllıonnan asty. AQSh-ta koronavırýsqa shaldyǵýdyń táýliktik sany boıynsha barlyq elder arasynda antırekord tirkeldi — 1,48 mln adam. Sondaı-aq Izraılde COVID-19 jańa jaǵdaılarynyń eń kóp sany anyqtaldy – 37 887.