Eýropa gazdyń 18 paıyzyn áli de Reseıden alyp otyr

<p>ASTANA. KAZINFORM — «EO energetıkalyq odaǵynyń jaǵdaıy» jyl saıynǵy baıandamasy Eýropanyń áli de Reseıge arqa súıeıtinin jáne EO atqarýshy bıligi qazba otynynan bas tartýdyń baıaý qarqynyna alańdaıtynyn kórsetip otyr, dep habarlaıdy <a href="https://ru.euronews.com/business/2024/09/11/eu-gaz" target="_blank" rel="noopener">Euronews.</a></p>

2022 jyldan beri jetkizilimderdiń aıtarlyqtaı qysqarǵanyna qaramastan EO óz gazynyń besten bir bóligine jýyǵy Reseıge táýeldi bolyp qala beredi, al EO-nyń energetıka jónindegi komıssary Kadrı Sımson bloktyń ony únemi keńeıtilip otyratyn sanktsııa rejımine qosýǵa daıyn ba degen suraqqa jaýap berýden bas tartty. 

«Biz Eýropanyń energetıkalyq qaýipsizdigine nuqsan keltirmeı, aqyryndap reseılik gazdan kezeń-kezeńimen bas tartýǵa tolyq daıynbyz», — dedi Sımson Brıýsselde tilshilerge EO energetıka odaǵynyń jyl saıynǵy jaǵdaıy týraly baıandamasyn jarııalaý kezinde.

Baıandamada reseılik gazdy tutyný 150 mlrd tekshe metrden nemese 2022 jylǵa deıingi barlyq ımporttyń 45 paıyzynan aıtarlyqtaı tómendegenimen, tamyz aıyna deıingi segiz aı ishinde EO burynǵydaı ımporttyń 18 paıyzyn Reseıden alǵanyn moıyndaıdy.

Bul Reseı áli de Eýropanyń Norvegııadan keıingi ekinshi iri jetkizýshisi ekenin bildiredi.

Eýrokomıssııa Reseıdiń tabıǵı gaz ımportyna sanktsııa salýdy josparlap otyr ma degen suraqqa Sımson Reseı qazirdiń ózinde qolda bar barlyq tetikterin joǵaltqanyn aıtty. 

«Keıbir kompanııalardyń Reseıden áli de alyp jatqan kólemi olardyń bizdi budan bylaı bopsalaýyn múmkin emes etedi — balama nusqalar bar», — dedi Sımson.

Ol Eýropadaǵy gaz qoımalarynyń qys bastalmaı turyp tolyp ketkenin atap ótti.