Eýropa chempıonatynda Qazaqstan quramasy San-Marınony 3:1 esebimen jeńdi
Memleket basshysy Qasym-Jomart Toqaev Qazaqstan ulttyq quramasynyń San-Marıno komandasyna qarsy oıynyna qoldaý kórsetý úshin «Astana Arena» stadıonyna keldi.
Memleket basshysymen birge ulttyq quramaǵa qoldaý bildirý úshin dańqty sportshylar, sport ardagerleri men mádenıet qaıratkerleri de keldi.
Olardyń arasynda Qazaqstannyń halyq ártisi Dımash Qudaıbergen, mını-fýtboldan Qazaqstan ulttyq quramasynyń bas bapkeri Paýlý Rıkardý Fıgeıra Sılva (Kaka) jáne taǵy basqalary bar.
Kezdesý barysynda qazaqstandyq fýtbolshylar birden shabýylǵa kóshti. Dese de oǵan qarsylas qurama qorǵaýshylary laıyqty tótep bere bildi.
Oıynnyń 19-mınýtynda qazaqstandyq Islam Chesnokov San-Marıno qaqpasyna alystan gol soqty. Osylaısha ol ulttyq qurama jeıdesindegi tuńǵysh gol avtory atandy.
Budan keıin de alań ıeleriniń gol soǵatyn birneshe múmkindigi bolǵan edi. Dese de esep ózgere qoıǵan joq.
Ekinshi kezeńde alǵashqy mınýttan qazaqstandyq fýtbolshylar tizgindi óz qolyna alýǵa tyrysty. Nátıjesinde 51-mınýtta Islam Chesnokov oıyn barysynda ekinshi márte mergendik tanytty.
Al 60-mınýtta San-Marıno oıynshysy Sımone Franchozı esep aıyrmasyn qysqartty.
Oıynnyń 92-mınýtta olardyń qaqpasyna belgilengen penaltıden Abat Aıymbetov múlt ketken joq.
Osylaısha Qazaqstan qarsylasynan 3:1 esebimen basym tústi.
El quramasy H tobynda 8 oıynnan keıin 15 upaı jınap, úshinshi orynda tur.
Alǵashqy eki oryndaǵy Slovenııa men Danııanyń enshisinde 19 upaıdan bar.
Endi qazaqstandyq fýtbolshylar 20 qarashada syrt alańda Slovenııamen kezdesedi.
Sondaı-aq búgin atalǵan topta Fınlıandııa men Soltústik Irlandııa («Qazsport» 23.00), Danııa men Slovenııa («Qazsport» 01.45) oıyndary ótedi.