Eýropa chempıonatynda eldi qaılamen qorqytqan er adamǵa polıtsııa oq atty

<p>ASTANA. KAZINFORM — Gambýrg qalasynyń ortalyǵynda muzshapqysh alyp júrgen er adamdy ustaý úshin polıtsııa arnaıy operatsııa ótkizdi, dep habarlaıdy <a href="https://www.bbc.com/russian/articles/czdd2dv9nxko" target="_blank" rel="noopener">VVS</a> qala bıligine silteme jasap. </p>

Habarlanǵandaı, polıtsııa qyzmetkerleri qarýdan oq jaýdyryp, ony aıaǵynan jaraqattaýǵa májbúr bolǵan. 

Jergilikti BAQ bul oqıǵa Nıderland fýtbol komandasy jankúıerleri aımaǵynyń janynda bolǵanyn jazady — sol kúni fýtboldan Eýropa chempıonatynda gollandyqtar Polshamen oınaǵan edi. 

Polıtsııa óz málimdemesinde er adamnyń polıtsııa qyzmetkerlerin qaılamen jáne «tutandyrǵyshpen» qorqytqanyn aıtady.

Polıtseıler áýeli oǵan burysh spreıimen toıtarys berýge tyrysqan, sodan keıin atys qarýyn qoldanǵan.

Bir polıtseı shabýyldaýshyny toqtatý úshin eskertý oǵyn atqan, sosyn er adam jerge qulap túskenshe birneshe ret oq atyldy.

Er adam jaralanyp, aýrýhanada jatyr. Ózge zardap shekkender týraly eshteńe aıtylmady.

«Bul jaǵdaıdyń fýtbolǵa esh qatysy joq», — dedi Gambýrg polıtsııasynyń ókili.

Shabýyl jergilikti ýaqyt boıynsha saǵat 12:30–da (10:30 GMT) Rıperban kóshesinde boldy.

Qalada shamamen 30 myń gollandııalyq jankúıer jáne sonsha polıak jankúıeri bar. Oıyn jergilikti ýaqytpen saǵat 15:00–de bastalǵan, bul oqıǵa oǵan eshqandaı áser etken joq.