Eýropa chempıonaty: Anglııa men Danııa jarysty jalǵastyrady
C tobyndaǵy barlyq quramanyń jarysty jalǵastyrýǵa múmkindigi bar edi.
Dese de olardyń arasynda Anglııa quramasy eki oıynda tórt upaı jınap, joldamaǵa qol jetkizýge bir taban jaqyn turǵan-dy.
Esesine Slovenııa nebári eki upaıdy qanaǵat tutyp, jaǵdaıyn qıyndatyp aldy. Áıtkenmen olar Anglııamen oıynda jeńiske jetse, pleı-off satysyna shyǵýyna jol ashylatyn.
Match barysynda esep ashylǵan joq. Quramalar 0:0 esebimen teń tústi.
Taǵy bir oıynda Danııa men Serbııa oınady.
Dat fýtbolshylary eki kezdesýde de teń oıyndy mise tutty.
Sonyń saldarynan jarysty jalǵastyrý úshin olarǵa tek jeńiske jetý talaby alda turdy.
Degenmen toqsan mınýt boıy quramalar bir-biriniń qaqpasynan sańylaý taba alǵan joq. Oıynda 0:0 esebi tirkeldi.
Bul toptan ázirge Anglııa men Danııa quramalary pleı-off satysyna joldama aldy.
Al Slovenııa alda úshinshi oryn alǵandar arasynda úzdik kórsetkishimen jarysty jalǵastyrýǵa múmkindik alýy múmkin.
Eske salsaq, 25 maýsymda D tobynda Avstrııa Nıderlandty 3:2 esebimen tize búktirse, Frantsııa men Polsha 1:1 esebine qanaǵat bildirdi.
Endi 26 maýsymda E tobynda Slovakııa men Rýmynııa, Ýkraına men Belgııa quramalary kezdesedi.
Al F tobynda Chehııa men Túrkııa, Grýzııa men Portýgalııa sheberlik baıqasady.