Eýroodaqtyń arnaıy ókili qyrǵyz-tájik shekarasyndaǵy shıelenis týraly pikir bildirdi
«Meniń oıymsha, Qyrǵyzstan men Tájikstan arasyndaǵy shekaradaǵy qaqtyǵys shekarany delımıtatsııalaý jáne demarkatsııalaý, birlesken sý resýrstaryn basqarý mańyzdy másele ekenin kórsetip otyr. Bul – tez arada sheshilýi qajet, óte mańyzdy syn-qater deýge bolady», - dedi Pıter Býrıan Nur-Sultanda ótken jýrnalıstermen kezdesýde.
Eýroodaq ókili shekara memleketterdi ajyratpaı, kerisinshe biriktiretin faktor bolý kerektigin atap ótti
«Biz aradaǵy kelissózderdi shekaralardy basqarýdyń óńirlik BOMCA baǵdarlamasy arqyly qoldaýǵa daıynbyz. Bul baǵdarlama 22 mıllıon eýro kóleminde qarjylaı qoldaýǵa ıe boldy, oǵan Aýǵanstan da kiredi», - dedi EO-nyń Ortalyq Azııa boıynsha arnaıy ókili.
Sondaı-aq, ol shekaradaǵy baılanystardyń yntymaqty damýy óńirdegi esirtki aınalymyna da tosqaýyl bolatynyn eske saldy.
«Shekara mańy yntymaqtastyǵy men saýdany damytý arqyly biz adamdardyń erkin qozǵalysyna, shekaradaǵy ózge de problemalardy sheshýge yqpal etip, esirtkiniń zańsyz aınalymy men kontrabandaǵa tosqaýyl qoıǵymyz keledi. Búgingi qaqtyǵystyń bir qyry osyǵan kelip tireledi», - dep túıindedi Pıter Býrıan.
Avtory Tımýr Dúısekeev