Eýroodaqta halyq sany 2100 jylǵa qaraı 27,3 mıllıonǵa azaıady

ASTANA. QazAqparat - Eýropalyq odaq úlken demografııalyq ózgeristerdiń aldynda tur, jańa boljam boıynsha, ǵasyr sońyna qaraı ondaǵy halyq sany aıtarlyqtaı azaıady. Bul týraly QazAqparat Euronews-ke silteme jasap habarlaıdy.

Eýrostat esepbinshe, 2100 jylǵa qaraı halyq sany 6%-ǵa nemese 27,3 mln adamǵa qysqarady.

COVID-19 pandemııasynan týyndaǵan eki jyldyq quldyraýdan keıin EO halqynyń sany 2022 jyly qalpyna kele bastady jáne aǵymdaǵy jyldyń basynda 451 mln-ǵa jetti. Bul ósim negizinen ýkraındyq bosqyndardyń jappaı aǵynymen baılanysty.

Boljam qurlyqtaǵy týý, ólim jáne kóshi-qon derekteri negizinde jasaldy.

EO statıstıka basqarmasynyń sońǵy esebine sáıkes, bloktaǵy halyq sany 2026 jyly 453 mln-ǵa jetip, 2100 jylǵa qaraı 420 mln-ǵa deıin azaıady.

2100 jylǵa arnalǵan demografııalyq pıramıda qoǵamnyń azaıyp, qartaıýyn boljaıdy. Balalardyń, 20 jasqa deıingi jastardyń jáne eńbekke qabiletti adamdardyń úlesi kemip, 65 jáne odan joǵary jastaǵy adamdardyń úlesi artady.

2100 jyly 65 jáne odan joǵary jastaǵy adamdar sany 2022 jylǵy 21 paıyzdan 32 paıyzdy quraıtyn bolady.

Demografııalyq pıramıda qazirgige qaraǵanda áldeqaıda keńirek kórinedi: 20 jasqa deıingilerge qaraǵanda 80 jastan asqan adamdar kóp bolady.

Bul boljamdar osy jyldyń basynda gazet taqyryptarynda Qytaıdaǵy halyq sanynyń alty onjyldyqtaǵy alǵashqy azaıýy týraly jazylǵannan keıin jasalǵan.

2100 jylǵa qaraı EO halqynyń boljamdy tómendeýine qaramastan, oǵan keıbir múshe elderde halyq sanynyń kóshi-qon arqyly kóbeıýi kútilýde. Bul - Belgııa, Chehııa, Danııa, Irlandııa, Frantsııa, Kıpr, Lıýksembýrg, Malta, Nıderlandy, Avstrııa, Shvetsııa jáne Islandııa.