Eýroodaqta bazalyq mólsherleme 3% deıin ósti

ASTANA. QazAqparat – Eýropa ortalyq banki úsh negizgi paıyzdyq stavkany 50 pýnkte kóterdi. Endi Eýroodaqta bazalyq mólsherleme – 3% quraıdy. Bul 2008 jyldan bergi eń joǵary kórsetkish, dep habarlaıdy QazAqparat Euronews agenttigine silteme jasap.

EOB basshysy Krıstın Lagard bank ınflıatsııa saldaryn tómendetý úshin kredıt kórsetkishin odan da ári kótere berýge daıyn ekenin jetkizdi.

«Inflıatsııa qysymyn eskere otyryp, naýryzdaǵy aqsha-kredıt saıasaty boıynsha otyrys kezinde biz paıyzdyq mólsherlemeni taǵy da 50 bazalyq pýnkte kótermekpiz. Sodan keıin aqsha-kredıt saıasatymyzdyń odan keıingi baǵytyn baqylaımyz. Paıyzdyq mólsherlemeni restrıktıvti dárejede saqtaý ýaqyt óte kele suranysty ustap turý arqyly ınflıatsııany qysqartady, sondaı-aq ınflıatsııalyq boljamnyń ósý qaýpinen qorǵaıdy», - dedi EOB tóraǵasy Krıstın Lagard.
Energııa tasymaldaýshylar baǵasynyń tómendeýine qaraı, Eýropa ortalyq banki qańtardaǵy jyldyq ınflıatsııa qarqyny 9,2 paıyzdan 8,5-ke tómendegenin tirkedi. Degenmen bul kórsetkish retteýshi bekitken maqsattan birneshe ese joǵary: Eýroaımaqtaǵy ınflıatsııa 2% dárejesine qaıtýy kerek, delingen habarlamada.

Foto: ru.euronews.com