Eýroodaqta balalardyń 25 paıyzy kedeılik sheginde ómir súrip jatyr

ASTANA. QazAqparat – Save the Children («Balalardy qutqaramyz») úkimettik emes uıymy Eýroodaqta kedeılik sheginde turǵan balalardyń sany 2021 jyly 200 myńǵa artyp, 19,6 mıllıonǵa jetkenin málimdedi, dep habarlaıdy QazAqparat Euronews agenttigine silteme jasap.

7 naýryzda jarııalanǵan baıandamada Eýroodaqtaǵy ár tórtinshi bala 2021 jyldyń sońynda ómir quny, klımat daǵdarysy men COVID-19 syndy faktorlardyń qosylyp, kóptegen otbasynyń kirisi tómendeýi saldarynan kedeılik shegine jetip, áleýmetten oqshaýlanyp qaldy.

Save the Children Germany uıymynda balalar kedeıligi men áleýmettik teńsizdik máselelerimen aınalysatyn Erık Groshaýs mundaı sandy «apattyq» dep atap, Eýroodaqtaǵy kedeılikte ómir súrip jatqan balalardyń 10%-nan kóbi tıesili Germanııany «ýádelerin oryndaýǵa» shaqyrdy.

Kedeılik qaýpi tónip turǵan, kórsetkishi eń joǵary elder Rýmynııa men Ispanııa bolyp shyqty: 41,5% jáne 33,4%. Eń tómengi kórsetkish Fınlıandııa men Slovenııada tirkeldi.

Zertteýshiler jańa derekterdi jınaqtaǵan keı elderdegi jaǵdaı Reseı Ýkraınaǵa basyp kirgennen keıin jáne onyń jaǵymsyz saldarynan (azyq-túlik pen energııanyń qymbattaýy) soń odan saıyn nasharlap ketken.

Máselen, uıymnyń esepteýinshe, 2022 jyly 40% rýmyn úı sharýashylyǵynyń tabysy aldyńǵy jylmen salystyrǵanda tómendegen, al shyǵyny 98%-ǵa kóbeıgen.

Ásirese mıgrant-balalar, bosqyndar men baspana suraýshylar zardap shegip otyr. Sondaı-aq tolyq emes otbasy, kópbalaly otbasy men múmkindigi shekteýli balalar qaýip tobynda tur.

Balalarǵa arnalǵan eýropalyq kepildik – ósip kele jatqan teńsizdik máselesin sheshetin jáne mıllıondaǵan balanyń jarqyn bolashaǵyn qamtamasyz etetin kilt.

«Úkimet bul tetikti balalar kedeıligimen kúresý úshin tolyqtaı qoldanyp jatqanyna senimdi bolýy kerek», - dep málimdedi Save the Children uıymynyń eýropalyq bólimshesiniń dırektory.