Eýroodaq Ortalyq Azııada quny 55 mln eýrolyq úsh baǵdarlamany iske asyrady

NUR-SULTAN. QazAqparat – Eýroodaq Ortalyq Azııada quny 55 mln eýrolyq úsh baǵdarlamany iske asyrmaq. Bul týraly QR SІM resmı ókili Aıbek Smadııarov málim etti, dep habarlaıdy QazAqparat tilshisi.

«28 qarashada Qazaqstan astanasynda Eýropalyq odaq saýdany damytý, zańnyń ústemdigi men Ortalyq Azııadaǵy iskerlik tartymdylyq boıynsha jalpy bıýdjeti 55,6 mln eýrony quraıtyn úsh jańa óńirlik baǵdarlamasyn iske qosýǵa oraılastyrylǵan «Aımaqtyń órkendeýi úshin Ortalyq Azııadaǵy yqpaldastyqty kúsheıtý» atty konferentsııasyn ótkizedi. Bul is-shara bizdiń óńirdiń ósimine qol jetkizý úshin Eýropalyq odaqtyń Qazaqstan Respýblıkasyndaǵy ókildigi, Eýropa keńesi, Halyqaralyq saýda ortalyǵy jáne Ekonomıkalyq yntymaqtastyq jáne damý jónindegi uıymymen birlesip, uıymdastyrylady», - dedi Aıbek Smadııarov.

Forým jumysyna Qyrǵyz Respýblıkasy, Tájikstan, Túrikmenstan, Ózbekstannyń úkimettik delegatsııalary qatysady.