Eýroodaq Lıvanda BUU bitimgerlerine jasalǵan shabýyldy aıyptady

<p>ASTANA. KAZINFORM — Eýropalyq odaq «kók syzyq» tóńiregindegi shıeleniske qatty alańdaýly. EO BUU mıssııalaryna jasalǵan barlyq shabýyldy aıyptaıtynyn jetkizdi.</p>

Eýropalyq odaqtyń habarlaýynsha, Brıýssel Izraıl qarýly kúshteriniń (IDF) Lıvanda ýaqytsha turaqtaǵan bitimgerlerge (UNIFIL) jasaǵan shabýylyna alańdaýshylyǵyn bildirip otyr. Oqys oqıǵa saldarynan birneshe bitimger jaralanyp qalǵan bolatyn.

— BUU bitimgerlerine jasalǵan shabýyldar halyqaralyq quqyqty óreskel buzý bolyp esepteledi, ári múldem qabyldanbaıdy. Mundaı shabýyldardy tez arada toqtatý qajet… Barlyq sýbekti BUU qyzmetkerleri men múlkiniń qaýipsizdigin qamtamasyz etý boıynsha barlyq sharany qabyldaýǵa, sondaı-aq kez kelgen ýaqytta BUU ǵımarattarynyń qol suǵylmaýshylyǵyn saqtaýǵa tıis. Biz Izraıl úkimetinen Ońtústik Lıvandaǵy turaqtylyqty qamtamasyz etip otyrǵan BUU bitimgerlerine jasaǵan shabýylyna qatysty túsinikteme kútemiz, ári bul oqıǵaǵa qatysty tolyqqandy tergeý júrgizilýin talap etemiz, — delingen Eýroodaq málimdemesinde.

Eýroodaq barlyq tarapty kez kelgen ýaqytta BUU bitimgerleriniń qaýipsizdigin qamtamasyz etý boıynsha mindettemelerin tolyq oryndaýǵa shaqyrdy. Sondaı-aq Qaýipsizdik keńesiniń 1701 rezolıýtsııasyn iske asyrý boıynsha jumysty jalǵastyrýdy usyndy.

Budan bólek málimdemede UNIFIL qarýly kúshteri men basqa da qyzmetkerleri EO-ǵa múshe 16 memleketke ózindik úlesin qosyp kele jatqany aıtyldy. Olar halyqaralyq beıbitshilik pen qaýipsizdikti saqtaý barysynda qolaısyz jaǵdaılarda jumys istep jatqany da habarlandy. Bul rette EO olardyń kásibıligin moıyndaıtynyn, ári UNIFIL-ge óz tarapynan qoldaý kórsetetinin atap ótti.

— Biz Izraıldiń «Hezbolla» tusynan oq jaýdyrǵanyna alańdaımyz. Ony toqtatý kerek. Sondaı-aq, Izraıl qarýly kúshteriniń Lıvannyń halyq tyǵyz qonystanǵan aýdandaryna jasaǵan soqqysy saldarynan beıbit halyq zardap shegip, qonys aýdarýǵa májbúr. Biz barlyq tarapty qandaı jaǵdaı bolmasyn halyqaralyq gýmanıtarlyq quqyqty saqtaýǵa shaqyramyz, — delingen málimdemede.

Eske salsaq, 11 qazanda TsAHAL Lıvannyń ońtústiginde Nakýrdaǵy bazada ornalasqan BUU bitimgerleriniń pýnktine shabýyl jasady.

BUU derekterine sáıkes, oqys oqıǵa saldarynan eki adam jaralandy. Bireýiniń jaǵdaıy aýyr dep baǵalanýda.

Buǵan deıin Izraıl bitimgerlerden áskerı alańdardan ketýdi talap etken bolatyn. Degenmen UNIFIL «kók syzyq» boıynda mekendegen jerinde qalatyn bolyp sheshti.

Bul Lıvanǵa jasalǵan alǵashqy shabýyl emes. Seısenbi kúni  Izraıl kezekti ret Lıvanǵa áýe shabýyl jasaǵan bolatyn. Saldarynan qaza tapqandar sany 22 adamǵa jetti, taǵy 80-i jaraqat aldy.