Eýroodaq kóshbasshylary sammıtinde vaktsınalaý jáne COVID-19-dan keıingi qalpyna keltirý máselesi qaralmaq

BRıÝSSELЬ. QazAqparat – Sársenbi kúni Eýropalyq Keńes prezıdenti Sharl Mıshel EO elderiniń memleket jáne úkimet basshylaryna búgin bastalatyn eki kúndik sammıtke qatysýǵa resmı shaqyrtý hattaryn jiberdi, dep habarlaıdy QazAqparattyń menshikti tilshisi.

«Sizderdi BUU Bas hatshysy Antonıý Gýterreshpen jahandyq syn-qaterler men geosaıası máseleler boıynsha pikir almasýdan bastalatyn Eýropalyq Keńesimizdiń otyrysyna shaqyrǵanyma qýanyshtymyn.

COVID-19 pandemııasynan keıin qalpyna keltirý EO sheńberinde de, jahandyq deńgeıde de mańyzdy taqyryp bolady. EO boıynsha qarqyndy júrip jatqan vaktsınatsııa naýqany jáne tsıfrlyq COVID-19 sertıfıkatynyń iske qosylýy jaz aılarynda jáne odan keıingi ýaqytta erkin júrýdi jeńildetedi», - delingen qujatta.

Alaıda, Sh. Mıshel «koronavırýs mýtatsııalarynyń nusqalaryn muqııat qadaǵalap, olardyń taralýyn toqtatýdy úılesimdi túrde júrgizý kerek» dep eskertti.

«2021 jyldyń aqpan aıynda kelisilgendeı, biz aldaǵy daǵdarystarǵa jaqsy daıyndalý úshin pandemııadan osy ýaqytqa deıin alǵan alǵashqy sabaqtarmen bólisemiz. Biz EO eksport pen qaıyrymdylyq arqyly búkil álem boıynsha vaktsınatsııa jumystaryn qalaı jalǵastyra alatynyn, sondaı-aq vaktsınalardyń álemdik jetkizilimin qalaı arttyra alatyndyǵyn talqylaımyz», - dedi Eýropalyq Keńestiń basshysy.

Eýroodaq sammıtiniń basqa taqyryptarynyń qatarynda kóshi-qon, halyqaralyq máseleler blogy bolady.

Budan basqa, kezdesýge qatysýshylar EO-nyń ekonomıkalyq jandanýyn talqylaıdy, atap aıtqanda, «Next Generation EU» (EO-nyń kelesi býyny) qalpyna keltirý baǵdarlamasyn qorytyndylaıdy, pandemııadan keıin EO elderiniń tolyq jáne ınklıýzıvti ekonomıkalyq jaǵdaıyna baǵyttalǵan qalpyna keltirý men turaqtylyqtyń ulttyq josparlaryn kelisedi.