Eýroodaq ishten janatyn qozǵaltqyshqa qatysty talapty jumsartty

ASTANA. QazAqparat – Germanııa Eýroodaqtyń ishten janatyn qozǵaltqyshqa qatysty talapty jumsartýyna qoljetkizdi, dep habarlaıdy QazAqparat Euronews-ke silteme jasap.

Brıýssel ishten janatyn qozǵaltqyshty avtokólikterdi 2035 jyldan keıin de tirkeýge qoıýǵa ruqsat berdi, biraq olar jańa kómirtekti-neıtraldy sıntetıkalyq otynmen júrýi shart.

Naýryzdyń basynda iri ónerkásipke ıe Germanııa kelesi onjyldyqtyń ortasyna qaraı ishten janatyn qozǵaltqyshty jańa avtokólikter men fýrgondar satylymyna tyıym salý týraly qaýlyny blokqa qoıdy.

Berlın elektr otynymen júretin avtomobılderdi bólip qaraý kerektigin talap etti. Olardyń balamaly qýat kózderin paıdalaný arqyly jasalyp, ónerkásip qyzmeti nátıjesinde túziletin kómirqyshqyl gazyn tutyp qalatynyna qaraı kómirtekti-neıtraldy ekenin alǵa tartty.

Qazir mundaı otyndy premıým-klass avtokólikterin shyǵarýshy nemis pen ıtalııan kompanııalary nasıhattap júr.