Eýroodaq basshylary Brıýsselde fermerlermen kezdesti
Beısenbi kúni tańerteń Eýropalyq parlament ǵımaratynyń janynda myńnan astam traktor paıda boldy. Odaqtyń túkpir-túkpirinen kelgen narazylyq bildirýshi fermerler shóp úıindisin órtep, qola eskertkishti qulatty. Olar jalaqylaryn kóbeıtýdi, básekelestikti shekteýdi talap etip, klımat ózgerisimen kúresý sharalaryn synǵa alyp otyr.
EO-nyń Brıýssel sammıtine qatysýshy Eýrokomıssııa tóraǵasy Ýrsýla fon der Lıaıen, Belgııa men Nıderlandy premer-mınıstrleri Aleksandr De Kroo jáne Mark Rıýtte aýylsharýashylyq kásipodaqtarynyń ókilderimen kezdesý ótkizdi.
- Kezdesýde dıqandardyń aryz-shaǵymyn, muń-muqtajyn tyńdadyq. Ortaq sheshimge kelemiz degen oıdamyn. Óıtkeni maqsattarymyz ortaq. Máselen, tabıǵatty qorǵaý máselesi, - dedi Eýroodaq komıssııasynyń basshysy Ýrsýla fon der Lıaıen.
Agrarlyq sektor qyzmetkerleri Biryńǵaı aýylsharýashylyq saıasaty saldarynan týyndaǵan aýyr ákimshilik júktemege shaǵymdanyp, Eýroodaq elderiniń «Jasyl kelisimge» jáne astyq pen basqa da azyq-túlik ónimderiniń tómen baǵasyna narazylyqtaryn bildiredi. Biraq Eýropalyq Odaqqa kezekti tóraǵalyq etetin Belgııa fermerlerge onyń basymdyǵy jańartylatyn energııa kózderine kóshý, taza tehnologııalardy engizý jáne parnıktik gazdar shyǵaryndylaryn azaıtý ekenin aıtty.
Buǵan qosa, joǵary standartty eýropalyq mal sharýashylyǵymen aınalysatyn fermerler EO-nyń Ońtústik Amerıkamen bolashaqtaǵy erkin saýda kelisiminen qaýiptenedi. Olar bul kelisimniń Eýropany arzan ári sapasy tómen sıyr etimen toltyrǵanyn qalamaıdy.
Eske salaıyq, buǵan deıin EO kóshbasshylarynyń sammıti ótetin Brıýsselge traktorlar kolonnasy kirgenin habarlaǵan bolatynbyz.