Eýroodaq Aýǵanstan azamattarynyń qaýipsizdigin qamtamasyz etýge shaqyrdy

BRıÝSSELЬ. QazAqparat – Eýropanyń syrtqy is-qımyl qyzmeti 29 sáýir kúni Kabýldaǵy meshitte bolǵan lańkestik oqıǵaǵa baılanysty jeke málimdeme jasady, dep habarlaıdy QazAqparat menshikti tilshisi.

«Kabýlda taǵy bir jarylys boldy. Juma namazyna jınalǵan jamaǵat zardap shegip, kóp adam qaza tapty. Qasıetti Ramazan aıynda bazar, mektep nemese meshitke jıylǵan beıbit turǵyndarǵa osyndaı sumdyq shabýyldar jasalyp otyr», - delingen EO dıplomatııalyq vedomstvosynyń málimdemesinde.

Eýropalyq Odaq qaza tapqandardyń otbasylaryna qaıǵyryp kóńil aıtady. Zardap shekkenderdiń tez saýyǵyp ketýin tileıdi. Terrorǵa eshbir dinı senim-namymda oryn joq ekenine nazar aýdarady.

Aýǵanstandaǵy zorlyq-zombylyqtyń kúrt kóbeıýi aýǵandyqtarmen qatar, halyqaralyq qaýymdastyqty da qatty alańdatyp otyr. Aýǵanstannyń barlyq azamattary, sonyń ishinde áıelder men qyzdar, balalar, sondaı-aq etnıkalyq jáne dinı az toptar ózderiniń quqyqtary men bostandyqtaryn tolyq saqtaı otyryp, qaýipsizdikte ómir súrýge laıyq.

EO Aýǵanstannyń «de-fakto» bıligin barlyq aýǵan azamattarynyń qaýipsizdigin qamtamasyz etýge jáne kinálilerdi jaýapqa tartýǵa shaqyrady.

Eýropanyń syrtqy is-qımyl qyzmeti terrorızmge qarsy tıimdi saıasat pen Aýǵanstannyń ishinde de, onyń aýmaǵynan shyǵatyn da lańkestik qaýpin joıýǵa baǵyttalǵan sharalardy júzege asyrý óte mańyzdy ekenin atap ótti.

Buǵan deıin habarlaǵanymyzdaı, Aýǵanstannyń tórt qalasynda jarylys boldy.