Eýroodaq áskerı utqyrlyqty kóterý josparyn usyndy
«Beıbitshilikti saqtaý men bizdiń azamattardyń qaýipsizdigin qamtamasyz etý - Eýropalyq odaqtyń basty basymdyǵy. EO ishindegi utqyrlyqqa sep qosý daǵdarystardyń jedel túrde aldyn alýǵa, bizdiń mıssııany naqtylap, qaýipterge tezirek jaýap berýge múmkindik beredi», - dedi eýropalyq dıplomatııanyń basshysy Federıka Mogerını.
Bul jospar 2025 jylǵa qaraı eýropalyq qorǵanys odaǵyn qurý baǵytyndaǵy kezekti qadam bolmaq. Sonymen birge, jospar azamattyq qurylymdyq, eń birinshi kezekte kóliktik jobalardy josparlaý kezindegi áskerı talaptardy esepke alý maqsatyn kózdeıdi.
Qujat «EO ishinde de, onyń syrtynda da» áskerı qyzmetshiler men tehnıkalardyń qozǵalys jyldamdyǵyn arttyrýǵa arnalǵan birneshe qadamdardan turady.
Eýrokomıssııa 2019 jylǵa qaraı qandaı avtomagıstraldar, temir joldar men sý joldary áskerılerdiń qoldanysyna jaramdy ekenin, sonymen birge qandaı ınfraqurylymdardy jańartý qajettiligi baryn anyqtaıdy.
Buǵan qosa Eýropalyq komıssııa áskerı operatsııalar kezinde kedendik resmılilikti jeńildetý men jetildirý máselelerin qarastyryp, áskerı maqsattaǵy qaýipti júkterdi tasymaldaý erejelerin birizdendirý qajettigin anyqtamaq.
Eske sala ketsek, budan buryn Eýropalyq odaqqa múshe-memleketter jeke qorǵanys múmkindikterin damytýǵa arnalǵan kúshterdi biriktirýge múmkindik beretin Qorǵanys salasyndaǵy qurylymdanǵan turaqty yntymaqtastyq (PESCO) bastamasyna qosylǵan bolatyn.