Eýroodaq 2035 jylǵa qaraı benzınmen júretin avtokólikter satýǵa tyıym salýy múmkin

NUR-SULTAN. QazAqparat – Eýropalyq parlament músheleri sársenbide 2035 jylǵa qaraı ishki janý qozǵaltqyshtary bar jańa avtomobılderdi satýǵa tyıym salýdy qoldap daýys berdi, dep habarlaıdy QazAqparat tilshisi CNN basylymyna silteme jasap.

Bul shara áli Eýropalyq keńeste talqylanyp, zań retinde qabyldanýy kerek. Bul zań maquldansa, gıbrıdti avtomobılderdiń satylymy tómendep, elektr qýatymen júretin kólikterdi paıdalanýǵa tolyq kóshedi.

Bul shara qorshaǵan ortany lastaý boıynsha álemdegi úshinshi iri aımaq sanalatyn EO-nyń klımattyq saıasaty aıasynda júzege asady.

Avtomobıl ónerkásibi Eýropa ekonomıkasynda mańyzdy ról atqarady, onyń úlesine JІÓ-niń 7%-y tıesili jáne 14,6 mln jumys ornymen qamtamasyz etip otyr. Biraq, kólik - parnıkti gaz shyǵaryndylarynyń ósýine yqpal etip otyrǵan jalǵyz sala. 2017 jyly kómirqyshqyl gazy shyǵaryndylarynyń 21%-y jol kólik quraldaryna tıesili bolǵan.

Endi Eýropa odaǵynyń quramyna kirmeıtin Ulybrıtanııa ótken jyly 2030 jyldan bastap jańa benzın men dızeldi kólikterdi satýǵa tyıym salatynyn jarııalady, al jańa gıbrıdter 2035 jylǵa deıin satyla beredi.