Eýrokomıssııanyń «qara tiziminde» qazaqstandyq avıakompanııalar joq - EK
20 qazan kúni Brıýsselde (Belgııa) QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń tóraǵasy Talǵat Lastaev bastaǵan qazaqstandyq delegatsııa «Qazaqstannyń avıatsııalyq ákimshiligi» AQ (budan ári - QAÁ) bas dırektory Katalın Radý men QAÁ ókilderiniń qatysýymen Eýropalyq komıssııamen, ushý qaýipsizdigi jónindegi Eýropalyq agenttikpen (EASA) jáne Eýropalyq Odaq músheleri memleketter ókilderimen tehnıkalyq kezdesý ótkizdi. Eýropalyq delegatsııany Eýropalyq komıssııanyń ushý qaýipsizdigi bólimi basshysynyń orynbasary Pıter Sorensen basqardy.
Kezdesý barysynda qazaqstandyq tarap ushýdy paıdalaný, ushýǵa jaramdylyq, avıapersonaldy lıtsenzııalaý jáne Qazaqstandaǵy ushý qaýipsizdiginiń deńgeıin jaqsartý boıynsha QAÁ protsesterin standarttaý bóliginde qabyldanǵan sharalar men iske asyrylyp jatqan túzetý is-qımyldarynyń josparlary týraly habardar etti. Onyń ishinde, QAÁ qarjylandyrýdyń jańa tásilin engizý jáne Qazaqstandaǵy azamattyq avıatsııa salasyn retteýdiń eýropalyq modeline odan ári josparly kóshý bóliginde Qazaqstan Respýblıkasynyń qoldanystaǵy zańnamasyna kútiletin ózgerister tanystyryldy.
Eýropalyq Komıssııa delegatsııasynyń basshysy 2019 jyldan bastap Qazaqstanda iske asyrylyp jatqan azamattyq avıatsııany retteýdiń eýropalyq modelin joǵary baǵalap qoldady jáne bul ushý qaýipsizdiginiń eýropalyq standarttaryna tolyq sáıkes keletin álemdegi eń ozyq jáne eń tıimdi tásilderdiń biri bolyp tabylatynyn atap ótti. Sondaı-aq, Qazaqstanda turaqty avıatsııalyq retteýshiniń jumys isteýi jáne eldegi ushý qaýipsizdigin qamtamasyz etý jónindegi mindettemelerdi oryndaý úshin QAÁ resýrstaryn qarjylandyrý men qamtamasyz etýdiń jańa tetigin tıimdi iske asyrý qajettigi atap ótildi.
Sondaı-aq, Eýrokomıssııa ushýǵa jaramdylyq, ushýdy paıdalaný, áýe personalyn lıtsenzııalaý, ushý qaýipsizdigi basqarmasy, QAÁ protsesterin standarttaý jáne uıymnyń jańartylǵan qurylymy salalarynda atqarylǵan jumystardyń barysyn oń baǵalap, osy baǵyttaǵy jumysty jalǵastyrýǵa shaqyrdy. Eýropalyq tarap osy máselelerde jan-jaqty qoldaý kórsetýge daıyn ekendigin bildirdi.
Qazaqstannyń avıatsııalyq bılikteri usynǵan progress negizinde Eýropalyq komıssııa ókilderi búgingi kúni qazaqstandyq avıakompanııalarda Eýrokomıssııanyń ushý qaýipsizdigi tizimine («qara tizim») jáne Eýropaǵa ushýǵa qandaı da bir shekteýler engizý boıynsha qaýipter joq ekenin rastady.