Eýrokomıssııa Ýkraınaǵa EO-ǵa kandıdat mártebesin berýdi usyndy

KIEV. QazAqparat - Eýropalyq Komıssııa Ýkraınaǵa EO músheligine kandıdat mártebesin berýdi usyndy. Bul óz kezeginde máseleni Eýropalyq keńes deńgeıinde qarastyrý aldyndaǵy mindetti resmı qadam. Mundaı tujyrymdy Eýropalyq komıssııa alqasy otyrysynyń qorytyndysyn baıandaǵan komıssııa tóraıymy Ýrsýla fon der Lıaıen málimdedi, dep habarlaıdy QazAqparat Ýkrınformǵa silteme jasap.

Agenttik aqparatyna sáıkes, Ýkraınanyń EO músheligine bergen ótinishi Eýropalyq komıssııanyń tıisti sheshim qabyldaýyna sebep bolyp otyr. Sonymen qatar, atalǵan el Kopengagen krıterıılerinde kórsetilgen damyǵan demokratııalyq qoǵam qalyptastyrý talaptaryn oryndaýǵa nıetti.

Budan bólek búgin Eýropalyq komıssııa Ýkraına, Moldova jáne Grýzııanyń EO músheligine bergen ótinishterin qarady. Eýropalyq Keńes Ýkraınaǵa EO-ǵa úmitker mártebesin berý máselelerin 23-24 maýsymda talqylaıdy.

Buǵan deıin habarlaǵanymyzdaı, Eýropalyq Komıssııa Ýkraınadan kelgen bosqyndardy óz aýmaǵynda qabyldaý úshin Eýroodaqqa múshe memleketterge 3,5 mıllıard eýrodan astam avans tóledi.