Eýrokomıssııa tóraıymy Qazaqstanmen jasalǵan sýtegi kelisimi týraly aıtty

ASTANA. QazAqparat – Eýropalyq komıssııanyń tóraıymy Ýrsýla fon der Lıaıen Soltústik jarty shar memleketterin Jahandyq Ońtústikke qarjylyq qoldaýdy jedeldetýge shaqyrdy. Bul týraly QazAqparat Euronews aqparat agenttigine silteme jasap habarlaıdy.

Mysyrda ótken BUU-nyń 27-shi klımattyq konferentsııasynda sóılegen sózinde ol damyǵan elder jahandyq jylyný áserinen eń osal aımaqtarǵa kómek kórsetý úshin jyl saıyn 100 mlrd dollar paketin bólýdi ýáde etkenin eske saldy.

13 jyl buryn Kopengagende 15-shi konferentsııa kezinde berilgen bul ýáde áli oryndalǵan joq.

Ekonomıkalyq yntymaqtastyq jáne damý uıymy (EYDU) 2020 jyly baı elderdiń memlekettik jáne jeke qor túrinde jumyldyrǵan jalpy soma 83 mlrd-tan sál ǵana asady dep esepteıdi.

«Ońtústik elder resýrstarǵa baı. Kúshimizdi biriktireıik. Eýropalyq Odaq Mysyr, Namıbııa jáne Qazaqstanmen sýtegi seriktestigi jóninde kelisti. Biz Vetnam jáne Ońtústik Afrıka sııaqty seriktesterge ekonomıkasyn kómirteksizdendirýde qoldaý kórsetemiz. Osydan 7 jyl buryn Parıj konferentsııasynda qoıylǵan maqsatqa jetýimiz kerek. Eýropa kózdegen baǵytynan taımaıdy. 2030 jylǵa qaraı parnık gaz shyǵaryndylaryn kem degende 55%-ǵa azaıtamyz», - dedi Eýrokomıssııa tóraıymy.

Degenmen, keıbir mamandardyń pikirinshe, konferentsııaǵa qatysýshylardyń bári birdeı zııandy shyǵaryndylar Pákistandaǵy apatty sý tasqyny sııaqty ekstremaldy aýa raıy jaǵdaıyna qalaı ushyratatynyn túsinbeıdi.

«Copernicus» baǵdarlamasy (klımat monıtorıngi qyzmeti) sarapshylarynyń habarlaýynsha, rekordty ystyq jazdan keıin Eýropada qazan aıynda temperatýra eń jyly kórsetkishke jetti.

1991-2020 jyldar aralyǵyndaǵy bazalyq kórsetkish Tselsıı boıynsha 2 gradýsqa artty.

Foto: euronews.com