Eýrokomıssııa óz qyzmetkerlerine TikTok jelisin paıdalanýǵa tyıym saldy

ASTANA.QazAqparat - Eýrokomıssııa óz qyzmetkerlerine qytaılyq TikTok áleýmettik jelisiniń qosymshasyn korporatıvtik telefondar men gadjetterden, sondaı-aq jumys baǵdarlamalaryn paıdalanatyn jeke qurylǵylardan alyp tastaýdy buıyrdy. Sheshim Eýrokomıssııanyń Kıberqaýipsizdik boıynsha qabyldaǵan sharalarymen baılanysty, dep habarlaıdy QazAqparat Euronews-ke silteme jasap.

EO atqarýshy organdarynyń sheneýnikteri men qyzmetkerlerinen qosymshany 15 naýryzdan keshiktirmeı jumys qurylǵylarynan alyp tastaýdy surady.

«Eýrokomıssııa áriptesterimizdiń jáne bizben yntymaqtasatyndardyń barlyǵynyń kıberqaýipsizdigin qorǵaýǵa baǵyttalǵan. Bul turǵyda kıberqaýipsizdikke qatysty sheshim qabyldandy», - dedi ishki naryq máseleleri jónindegi eýrokomıssar Terrı Breton.

Eýropalyq komıssııa sonymen qatar óz qyzmetkerlerinen TikTok qoldanbasyn jeke qurylǵylarynan da alyp tastaýlaryn surady.

Sońǵy aılarda TikTok arqyly Beıjin paıdalanýshylardyń derekterine qol jetkizýine baılanysty batystyń nazaryna ilikti.

AQSh federaldy úkimetinde qosymshany paıdalanýǵa tyıym salynǵan, al keıbir amerıkalyq zań shyǵarýshylar eldegi TikTok jumysyna jappaı tyıym salýǵa tyrysyp jatyr.