Eýrokomıssııa 2018-2019 jyldardaǵy munaıdyń ortasha jyldyq baǵasyna boljam jasady

BRıÝSSELЬ. QazAqparat  - Eýrokomıssııa Brent markaly munaıdyń 1 barreline degen ortasha baǵa aǵymdaǵy jyly 63,9 dollar, kelesi jyly 67,7 dollardy quraıtyndyǵyn boljap otyr. Bul týraly retteýshiniń beısenbi kúni jarııalanǵan kóktemgi ekonomıkalyq boljamynda kórsetilgen, dep habarlaıdy QazAqparat tilshisi.

«Munaı baǵasynyń qazirgi qalpyna kele bastaýy OPEK elderi men Reseıdiń munaı óndirisin qysqartýǵa baılanysty kelisimin 2018 jyldyń sońyna sheıin uzartýy jáne OPEK elderiniń atalmysh kelisimdi tolyqtaı oryndap otyrǵandyǵy yqpal etti», - delingen qujatta.

Sondaı-aq, Venesýela sekildi jekelegen eksporterlerdiń energııa jetkizýdegi sátsizdikteri, Taıaý Shyǵystaǵy geosaıası teketirestiń artýy, atap aıtqanda, Iemen men Sırııadaǵy kıkiljiń, AQSh-tyń Iranǵa salǵan sanktsııalaryndaǵy naqtylyqtyń bolmaýy munaı baǵasyn joǵary ustap turǵandyǵy qujatta atap ótilgen.

Basqa jaǵynan alyp qaraǵanda, «qara altynnyń» budan ári óspeıtini jóninde ýáj keltirilgen, onda AQSh-tyń slantsty munaı óndirisi arttyrylatyndyǵy kútilip otyrylǵandyǵy, sonymen qatar kómirsýtek shıkizatyna álemdik suranystyń ósý qarqyny birshama tómendeıtindigi eskerilgen.

Buǵan deıin Eýrokomıssııa 2017 jyldyń qarasha aıyndaǵy kúzgi ekonomıkalyq boljamynda Brent markaly munaıdyń 1 barreliniń baǵasy 2018 jyly 55,7 dollar, 2019 jyly 54,7 dollar bolady dep boljaǵan bolatyn.

Foto: unikassa.ru