Eýrodepýtat Eýropalyq komıssııadan qazaqstandyqtar úshin vıza rejımin jeńildetýdi surady
Atalǵan sharaǵa qatysý úshin Brıýsselge QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan bastaǵan delegatsııa keldi.
Eýroparlament tobyn EP Ortalyq Azııadaǵy jáne Mońǵolııa elderi boıynsha (DCAS) delegatsııasynyń tóraǵasy Tomash Zdehovskıı basqardy.
Otyrys barysynda Qazaqstan-Eýropa yntymaqtastyǵynyń ózekti máseleleri, onyń ishinde saýda-ekonomıkalyq qarym-qatynas, Ortalyq Azııadaǵy aımaqtyq saıasatty damytý, adam quqyqtary, zań ústemdigi, QR azamattary úshin vızalyq rejımdi yryqtandyrý máseleleri talqylandy.
Osylaısha, eýropalyq depýtattarmen suhbat barysynda A.Quspan Qazaqstanda osy aımaqtaǵy aýqymdy jáne biregeı konstıtýtsııalyq reforma júrgizilip, ulttyq referendýmda qazaqstandyqtar tarapynan qoldaý tapqanyn baıandap berdi.
«Nátıjesinde azamattardyń saıası protseske qatysýy aıtarlyqtaı keńeıdi. Ulttyq dıalog jańa deńgeıge kóterildi. Saıası reformalardyń mańyzdy bóligi Prezıdentke bir rettik jeti jyldyq mandat berý boldy. Biz aralas saılaý júıesine kóshtik, qysqa merzim ishinde Prezıdent, Senat, Májilis jáne barlyq deńgeıdegi máslıhat depýtattarynyń saılaýyn ótkizdik. Adam quqyqtaryn qorǵaý júıesi jetildirildi, ombýdsmenderdiń mártebesi men ókilettigi kúsheıtildi», - dedi A.Quspan.
Sonymen qatar, Májilis komıtetiniń basshysy Brıýsselde Qazaqstanda «Balalarǵa arnalǵan ulttyq qor» qurylǵany týraly aıtty.
Onyń aıtýynsha, bar bolǵany bir aıdan keıin bizdiń tabıǵı baılyqtarymyzdan túsken qarajat Qazaqstandaǵy balalardyń esepshotyna túse bastaıdy.
«Reformalardy júrgizgen kezde biz eń aldymen ulttyq múddeni – ishki saıası turaqtylyqty oılaýymyz kerek. Áıtpese, Qazaqstannyń memlekettiligi men táýelsizdigine orny tolmaıtyn qaýip tónýi múmkin», - dep atap ótti A.Quspan.
Óz kezeginde eýropalyq depýtat T.Zdehovskıı qazaqstandyq depýtattar delegatsııasyn Eýropalyq Odaq aýmaǵynda bolyp jatqan oqıǵalardan habardar etti.
Atap aıtqanda, Eýrodepýtat Eýropada kelesi jyly birqatar saılaýǵa daıyndyq ótip jatqanyn aıtty.
Onyń sózinshe, 2024 jyldyń 6-9 maýsymy kúnderi ótetin jalpyeýropalyq saılaý erekshe mańyzdy oqıǵa bolmaq.
«Bul Eýroparlamentke Ulybrıtanııanyń qatysýynsyz ótetin alǵashqy saılaý bolady. Jalpy, bul qıyn saılaý bolmaq. Barlyq partııalar jaqsy nátıje kórsetedi dep úmittenemiz. Ekijaqty qarym-qatynasqa keletin bolsaq, biz - EO jáne Qazaqstan bolyp, elderimiz arasyndaǵy taýar aınalymyn arttyryp jatyrmyz. Sizdiń elde kóptegen eýropalyq ınvestorlar jumys isteıdi, bul jerde men «Shkoda» avtokontsernin atap ótkim keledi. Álbette, sizderdiń elderińizdegi jaǵdaıdy boljaýǵa bolady jáne bul óte mańyzdy», - dep atap ótti Eýroparlamenttiń DCAS basshysy T.Zdehovskıı.
Budan bólek, Eýroparlamenttiń cheh depýtaty Qazaqstannyń adam quqyqtaryn qorǵaý salasyndaǵy jetistikterin erekshe atap ótti. Osy turǵyda ol QR Adam quqyqtary jónindegi ýákili Talǵat Lastaevtyń ótken aptada Brıýsselge saparynyń oń nátıjelerine toqtaldy.
Parlamenttik yntymaqtastyq komıtetiniń otyrysyn jalǵastyra otyryp, eýropalyq depýtattar men QR Parlamenti Májilisiniń ókilderi Qazaqstandaǵy ekonomıkalyq jaǵdaı, Ortalyq Azııada jahandyq klımat, sý resýrstaryn saqtaýdyń ózekti máseleleri, Eýropa men Ortalyq Azııa arasyndaǵy kólik baǵyttary týraly pikir almasyp, sondaı-aq Aýǵanstandaǵy jaǵdaıǵa toqtaldy.
Belgııadaǵy qazaqstandyq BAQ-qa bergen túsiniktemesinde T.Zdehovskıı Eýroparlament Qazaqstan azamattary úshin vızalyq rejımdi jeńildetýdi tolyǵymen qoldaıtynyn atap ótti.
«Osyǵan baılanysty men Ortalyq Azııa elderi men Mońǵolııa elderi delegatsııasynyń basshysy retinde Eýropalyq komıssııaǵa hat joldap, Ýrsýla fon der Lıaıenniń jeke ózinen jaǵdaıdy jaqsartý úshin barynsha kúsh salýdy suraımyn», - dedi T. Zdehovskıı.