Eýro men fýnt-sterlıng álsirep jatqanda damýshy elderdiń valıýtasyna odan da aýyr salmaq túsedi – ekonomıst

ASTANA. QazAqparat – Belgili ekonomıst, Progente ekonomıkalyq zertteý ortalyǵynyń jetekshisi, Halyqaralyq Bıznes Ýnıversıtetiniń aǵa oqytýshysy Maqsat Halyq QazAqparat tilshisine telefon arqyly bergen suhbatynda jyl aıaǵyna deıin rýbl men dollar baǵamy qalaı qubylýy múmkin ekenin aıtty.

«Valıýta naryǵyndaǵy rýblge baılanysty jaǵdaı túsinikti. Ol qazir Reseı úkimetiniń rýbl baǵamyn qolmen ustap turǵanynan shyǵyp otyr dep aıtýǵa bolady. Odan bólek jalpy geosaıası jaǵdaıdyń da áseri bar. Ásirese, buǵan deıin rýbldiń kúsheıip ketýine Reseıdiń Eýropaǵa munaı men gazyn sata alǵany áserin tıgizdi. Munaı men gaz eksportynyń arqasynda Máskeýge sheteldik valıýta kelip otyrdy. Sondyqtan Reseı úshin, rýbl úshin qatty qysym bolǵan joq. Biraq kelesi jyldan bastap rýblge biraz qıyndyq týyndaıdy dep aıtýǵa negiz bar. Óıtkeni tolyq embargo jarııalanýy múmkin. Negizi jarııalap ta qoıdy. ıAǵnı, kelesi jyldan bastap Eýropa elderi Reseıdiń munaıy men gazyn almaımyz degen talap qoıyp otyr. Biraq onyń bári atalǵan elderdiń qystan qalaı ótetinine baılanysty. Eýropanyń keıbir memleketteri erteń sol kelisimde tura ma, turmaı ma degen máseleler de bar», - deıdi sarapshy.

Ekonomıst AQSh-tyń aqsha nesıe saıasaty buryn-sońdy bolmaǵan baǵytqa oıysqanyn eske saldy.

«Al dollarǵa qatysty aıtsaq, Federaldy rezervter júıesiniń basshysy Djerom Paýell buryn-sońdy bolmaǵan aqsha-nesıe saıasatyn júrgizip otyr. ıAǵnı, aqsha-nesıe saıasaty barynsha qatańdatyldy. Sońǵy ýaqyttarda dollardyń negizgi paıyzdyq mólsherlemesin qatarynan tórt ret, sońǵy retinde tipti birden 0,75 paıyzdyq pýnktige ósirip otyr. Onyń bári belgili dárejede dollardyń negizgi rezervti valıýtalarǵa qatysty qunynyń artýyna alyp keldi.

Qazirdiń ózinde eýronyń baǵamy dollarmen teńesip tur. Dollar baǵamy tipti brıtan fýnt-sterlıngine teńesip qaldy. Rezervti valıýtaǵa jatatyn Japonııanyń ıeni, Qytaıdyń ıýani dollarǵa qatysty álsirep jatyr. Demek negizgi rezervti valıýtalardyń ózi qunsyzdanyp jatqanda damýshy elderdiń valıýtasyna tipti úlken salmaq túsiredi», - deıdi ekonomıst ǵalym.

Onyń aıtýynsha, munyń saldary damýshy elderdiń ınvestıtsııalyq tartymdylyǵyna kóleńke túsirýi múmkin.

«Óıtkeni qazir Amerıkanyń qazynalyq qundy qaǵazdary áldeqaıda tıimdi bolyp tur. ıAǵnı, paıyzdary óskennen keıin, kez kelgen ınvestor damýshy elderge baryp aqsha quıǵansha Amerıkanyń qundy qaǵazdarynda ustap otyrýdy durys kóredi. Sol kezde damýshy elderden kapıtal aǵyny bolady. Osyndaı stsenarıı qazirdiń ózinde órbı bastady deýge bolady. Demek munyń bári aldaǵy ýaqytta bizdiń teńgemizdiń de álsireýine alyp keledi dep aıtýǵa negiz bolady», - dedi Maqsat Halyq.

Aıte ketsek, Kurs.kz derekteri boıynsha, Astanadaǵy valıýta aıyrbastaý oryndarynda 1 dollar 475 – 480 teńgeden satylyp jatyr.

Al 23 qyrkúıekte Reseı rýbliniń baǵamy 8,03 teńgege deıin barǵan bolatyn.

Foto: best-wallpaper.net